ក្រុមកូដករណាហ្គាវើលដ៍ បន្តធ្វើកូដកម្មនៅថ្ងៃសុក្រនេះ ដើម្បីទាមទារឱ្យមានការដោះលែងកញ្ញា ឈឹម ស៊ីថរ និងទម្លាក់ចោលការចោទប្រកាន់លើកូដករផ្សេងៗទៀតដែលកំពុងជាប់បណ្ដឹងនៅតុលាការ ព្រមទាំងទាមទារឱ្យមានដំណោះស្រាយវិវាទការងារ។
កូដករណាហ្គាវើលដ៍ កញ្ញា វណ្ណ រីណា មានប្រសាសន៍ថា កូដករជិត១០០នាក់ នៅថ្ងៃនេះ បាននាំគ្នាបន្តការតវ៉ា ដើម្បីទាមទារឱ្យមានការដោះលែងប្រធានសហជីពរបស់ពួកគេ គឺកញ្ញា ឈឹម ស៊ីថរ ឱ្យមានសេរីភាពវិញ និងទម្លាក់ចោលការចោទប្រកាន់លើកូដករផ្សេងៗទៀតដែលកំពុងជាប់បណ្ដឹងនៅតុលាការ រួមទាំងទាមទារឱ្យថៅកែណាហ្គាវើលដ៍ ទទួលថ្នាក់ដឹកនាំ និងសមាជិកសហជីពចូលធ្វើការងារវិញ។
កញ្ញា វណ្ណ រីណា ចាត់ទុកករណីចាប់ខ្លួនកញ្ញា ឈឹម ស៊ីថរ ដាក់ពន្ធនាគារ និងប្តឹងកូដករទៅតុលាការនោះថា ជាការគំរាមកំហែងបំបាក់ស្មារតីកូដករផ្សេងទៀតមិនឱ្យហ៊ានតវ៉ា និងជាការរំលោភសិទ្ធិមនុស្សធ្ងន់ធ្ងរ។
កូដកររូបនេះបានឱ្យដឹងថា ការតវ៉ានៅថ្ងៃនេះ គឺអាជ្ញាធរខណ្ឌចំការមន បានចុះទៅប្រាប់ឱ្យក្រុមកូដករផ្អាកការតវ៉ាមួយរយៈសិន ក្រោមហេតុផលថា សមត្ថកិច្ចចុះស៊ើបអង្កេតករណីការដាក់បង្កៃគ្រាប់បែកនៅតំបន់ដែលកូដករតវ៉ា ប៉ុន្តែកញ្ញាថា ក្រុមកូដករមិនស្ដាប់តាមនោះទេ គឺបន្តធ្វើកូដកម្មរហូតមានដំណោះស្រាយវិវាទការងារ។
កញ្ញាបន្ថែមថា៖ «ខ្ញុំយល់ថា វាជាទង្វើមួយបំបិទសិទ្ធិសេរីភាព ជាការគំរាមកំហែងមិនឱ្យកម្មករផ្សេងៗទៀតហ៊ានមកចូលរួមតវ៉ា ដែលជាការពិតទៅ ពួកយើងតវ៉ានិងប្រើប្រាស់សិទ្ធិស្របទៅតាមច្បាប់។ ការគំរាមកំហែងដោយយកប្រព័ន្ធតុលាការមកដាក់សម្ពាធលើពួកយើង វាបង្ហាញថា ប្រព័ន្ធតុលាការយើងមិនឯករាជ្យ មានភាពទន់ខ្សោយ និងអយុត្តិធម៌សម្រាប់ពួកយើងជាជនរងគ្រោះណាស់»។
ក្រោយការចាប់ឃុំខ្លួនកញ្ញា ឈឹម ស៊ីថរ ជាលើកទី២ មិនបានប៉ុន្មានម៉ោងផង ក៏មានប្រតិកម្មពីសំណាក់សហគមន៍ជាតិ និងអន្តរជាតិជាបន្តបន្ទាប់ផងដែរ។
សហរដ្ឋអាមេរិក និងអូស្ត្រាលី ជាប្រទេសនាំមុខគេក្នុងការទាមទារឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ និងសមាជិកសហជីពផ្សេងទៀតដែលកំពុងជាប់ឃុំ ព្រមទាំងស្នើឱ្យដោះស្រាយបញ្ចប់វិវាទការងារនេះឱ្យបានត្រឹមត្រូវ។
ដោយឡែក កាលពីថ្ងៃទី៧ ខែធ្នូនេះ លិខិតរបស់សហព័ន្ធសហជីពអឺរ៉ុបផ្នែកចំណីអាហារ កសិកម្ម និងទេសចរណ៍ (EFFAT) បានផ្ញើទៅកាន់ឯកអគ្គរាជទូតខ្មែរប្រចាំប្រទេសបែលហ្ស៊ិក លោក នង សាកល ដោយបញ្ជាក់ថា ការចាប់ខ្លួនកញ្ញា ឈឹម ស៊ីថរ ជាការបំពានច្បាប់របស់កម្ពុជា និងបំពានលើកាតព្វកិច្ចការងារ និងសិទ្ធិមនុស្សជាអន្តរជាតិរបស់រាជរដ្ឋាភិបាលកម្ពុជា។ ករណីនេះ EFFAT ទាមទារឱ្យរដ្ឋាភិបាលដោះលែងកញ្ញា ឈឹម ស៊ីថរ ជាបន្ទាន់ និងដោយគ្មានលក្ខខណ្ឌ៕
