សេតវិមានបានឱ្យដឹងនៅថ្ងៃព្រហស្បតិ៍ម្សិលមិញនេះថា ក្រុមហ៊ុនយោធាឯកជនមួយរបស់រុស្ស៊ីដែលមានឈ្មោះថា Wagner Group បានទទួលយកការដឹកជញ្ជូនអាវុធពីកូរ៉េខាងជើង ដើម្បីជួយពង្រឹងដល់កងកម្លាំងរុស្ស៊ីសម្រាប់សង្គ្រាមឈ្លានពានក្នុងប្រទេសអ៊ុយក្រែន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមអ្នកនាំពាក្យក្រុមប្រឹក្សាសន្តិសុខជាតិប្រចាំសេតវិមាន លោក John Kirby អង្គភាពយោធាឯកជនខាងលើនេះ បានព្យាយាមស្វែងរកអ្នកផ្គត់ផ្គង់អាវុធពីជុំវិញពិភពលោក ដើម្បីគាំទ្រដល់ប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន។
ថ្លែងប្រាប់អ្នកយកព័ត៌មាន អ្នកនាំពាក្យរូបនេះបន្តថា៖ «យើងអាចធ្វើការបញ្ជាក់បានថា កូរ៉េខាងជើងបានបញ្ចប់ការបញ្ជូនអាវុធលើកដំបូងទៅឱ្យក្រុម Wagner ដែលបានទិញពីពួកគេ។ កាលពីខែមុន កូរ៉េខាងជើងក៏បានបញ្ជូនគ្រាប់រ៉ុក្កែត និងកាំជ្រួចម៉ីស៊ីល ចូលទៅក្នុងប្រទេសរុស្ស៊ី ដើម្បីឱ្យក្រុមទាហានស៊ីឈ្នួល Wagner ប្រើប្រាស់ផងដែរ»។
ជាមួយគ្នានេះ អាមេរិកក៏បានធ្វើការប៉ាន់ប្រមាណដែរថា ក្រុម Wagner នេះ បច្ចុប្បន្នមានយោធាចំនួន ៥ម៉ឺននាក់ ដែលត្រូវបានដាក់ពង្រាយនៅក្នុងប្រទេសអ៊ុយក្រែន ក្នុងនោះ ១ម៉ឺននាក់គឺជាយោធាជាប់កិច្ចសន្យា និង ៤ ម៉ឺននាក់ផ្សេងទៀតគឺសុទ្ធសឹងតែជាអ្នកទោសដែលត្រូវបានជ្រើសរើសចេញពីពន្ធនាគាររុស្ស៊ី។
ទាក់ទិននឹងករណីនេះ រុស្ស៊ី និងកូរ៉េខាងជើង មិនបានឆ្លើយតបភ្លាមៗចំពោះសំណើសុំការអត្ថាធិប្បាយឡើយ។
ទោះជាយ៉ាងណា ស្ថាបនិក និងជាអ្នកគ្រប់គ្រងក្រុមហ៊ុនយោធាឯកជន Wagner លោក Yevgeny Prigozhin បានបដិសេធការលើកឡើងដោយសេតវិមាននេះ ដោយចាត់ទុកថាជាពាក្យចចាមអារ៉ាមតែប៉ុណ្ណោះ។
ថ្លែងក្នុងសេចក្តីថ្លែងការណ៍មួយ លោកបន្តថា៖ «មនុស្សគ្រប់គ្នាបានដឹងរួចទៅហើយថា ប្រទេសកូរ៉េខាងជើងមិនបានផ្គត់ផ្គង់សព្វាវុធណាមួយដល់ប្រទេសរុស្ស៊ី អស់រយៈពេលជាយូរមកហើយ។ សកម្មភាពនេះមិនដែលត្រូវបានធ្វើឡើងនោះទេ»។
លោកបន្ថែមថា៖ «ដូច្នេះហើយព័ត៌មានទាក់ទងនឹងការផ្គត់ផ្គង់អាវុធពីកូរ៉េខាងជើង គឺគ្មានអ្វីក្រៅពីពាក្យចចាមអារ៉ាម និងការទស្សន៍ទាយតែប៉ុណ្ណោះ»។
គួរបញ្ជាក់ថា អង្គភាពយោធាឯកជន Wagner ត្រូវបានបង្កើតឡើងដំបូងកាលពីឆ្នាំ២០១៤ ដើម្បីបញ្ជូនទាហានមានសមត្ថភាពប្រយុទ្ធទៅតំបន់ដុនបាស់ ភាគខាងកើតអ៊ុយក្រែន។
ទោះជាយ៉ាងណា លោកប្រធានាធិបតី វ្លាឌីមៀរ ពូទីន ធ្លាប់បានលើកឡើងកាលពីពេលកន្លងទៅថា ក្រុមនេះមិនមែនតំណាងឱ្យប្រទេសរុស្ស៊ីឡើយ ដោយពួកគេគ្រាន់តែដើរតួជាក្រុមហ៊ុនយោធាឯកជនប៉ុណ្ណោះ៕
