អង្គការឃ្លាំមើលសិទ្ធិមនុស្សលីកាដូ ហៅចំណាត់ការចាប់ខ្លួនយុវជនជាបន្តបន្ទាប់ ក្នុងពិធីរំឭកខួប៣ឆ្នាំនៃការបាញ់សម្លាប់លោក កែម ឡី ជាការប្រើកងកម្លាំងច្រើនលើសលុបបង្ក្រាបទៅលើសិទ្ធិបញ្ចេញមតិ ។
អង្គការលីកាដូ បានលើកឡើងលើបណ្តាញសង្គមរបស់ខ្លួន នាថ្ងៃពុធនេះ ថា នៅថ្ងៃទី៩ និងទី១០ ខែកក្កដានេះ អាជ្ញាធរបានឃាត់ខ្លួនមនុស្សចំនួន៧នាក់ ពាក់ព័ន្ធនឹងការសម្ដែងក្ដីរំលែកទុក្ខ និងការគាំទ្រចំពោះអ្នកវិភាគនយោបាយ ដែលត្រូវបានឃាតករបាញ់សម្លាប់ គឺលោកបណ្ឌិត កែម ឡី ។
លីកាដូ ឲ្យដឹងទៀតថា ខណៈដែលប្រជាពលរដ្ឋរំឭកខួប៣ឆ្នាំនៃឃាតកម្មលើលោកបណ្ឌិត នៅទីតាំងនៃអំពើឃាតកម្មក្នុងរាជធានីភ្នំពេញ ត្រូវបានហ៊ុមព័ទ្ធដោយកងកម្លាំងចម្រុះជាច្រើន។
លីកាដូ បញ្ជាក់ថា៖ «ការឃាត់ខ្លួនមនុស្សទាំងនេះ បង្ហាញទៅកាន់សាធារណជនថា ជាការបង្ក្រាបឥតឈប់ឈរនៃការប្រើប្រាស់កម្លាំងអាជ្ញាធរច្រើនលើសលុប ដើម្បីរារាំងប្រជាពលរដ្ឋកម្ពុជាពីការសម្ដែងសិទ្ធិក្នុងការបញ្ចេញមតិ និងសិទ្ធិជួបជុំគ្នា។
នៅថ្ងៃនេះ យុវជន៣នាក់ ត្រូវបានឃាត់ខ្លួននៅខាងក្រៅស្ថានីយប្រេងឥន្ធនៈកាល់តិចស្ដុបបូកគោ ក្នុងរាជធានីភ្នំពេញ បន្ទាប់ពីអ្នកទាំង៣ បានចូលរួមជាមួយយុវជន មេដឹកនាំសហជីព និងសមាជិកសង្គមស៊ីវិលដទៃទៀត ដើម្បីធ្វើពិធីរំលឹកខួបបាញ់សម្លាប់នេះ ក្នុងនោះមានឈ្មោះ សួង នាគព័ន្ធ ជុំ ហួត និងជុំ ហួ។
កាលពីថ្ងៃអង្គារម្សិលមិញ យុវជន៤នាក់ ក្នុងនោះមានទាំងយុវជន គង់ រ៉ៃយ៉ា ផងដែរ ត្រូវបានឃាត់ខ្លួនដូចគ្នា ក្រោយពីពួកគេផ្សព្វផ្សាយតាមបណ្តាញសង្គម លក់អាវយឺតដែលមានបោះពុម្ពភ្ជាប់រូបលោក កែម ឡី ។
លោក កែម ឡី ត្រូវបានឃាតករបាញ់សម្លាប់ទាំងកណ្ដាលថ្ងៃ កាលពីថ្ងៃទី១០ ខែកក្កដា ឆ្នាំ២០១៦ ខណៈ លោកកំពុងពិសាកាហ្វេពេលព្រឹកនៅស្ថានីយប្រេងឥន្ធនៈកាលតិចជាប់ស្ដុបបូកគោ។
បើតាមលីកាដូ ឃាតកម្មនេះ អាជ្ញាធរបានចាប់ខ្លួនអតីតទាហានម្នាក់ឈ្មោះ អឿត អាង ដែលក្រោយមកត្រូវបានផ្ដន្ទាទោសដាក់ពន្ធនាគារអស់មួយជីវីត នៅខែមីនា ឆ្នាំ២០១៧ បន្ទាប់ពីការស៊ើបអង្កេត និងសវនាការ ដែលត្រូវបានរិះគន់យ៉ាងខ្លាំងពីសំណាក់អ្នកឃ្លាំមើលជាតិ និងអន្តរជាតិ ថានៅមិនទាន់សមស្រប និងមិនទាន់គ្រប់គ្រាន់។