នៅថ្ងៃខួប២២ឆ្នាំនៃករណីឃាតកម្មលើលោក ជា វិជ្ជា ក្រុមអង្គការសង្គមស៊ីវិល បក្សនយោបាយ និងតំណាងសហជីព បន្ត​រំលឹកពីវិរៈភាពរបស់មេដឹកនាំសហជីព​សេរីកម្មកររូបនេះ ដែលបានលះ​បង់​កម្លាំងកាយចិត្ត និងជីវិត ក្នុងបុព្វហេតុការពារសិទ្ធិ និងសេរីភាពសហជីព ក្នុងនោះពួកគេក៏បន្តទាមទារឱ្យរដ្ឋាភិ​បាល ពន្លឿនការស៊ើបអង្កេតចាប់ឃាតករ​ពិត យកមកផ្តន្ទាទោសតាមច្បាប់ ដើម្បីផ្តល់យុត្តិធម៌ដល់លោក ជា វិជ្ជា និងក្រុមគ្រួសារ ព្រមទាំងបញ្ចប់វប្បធម៌​និទណ្ឌភាពនៅកម្ពុជា។

សង្គមស៊ីវិល បន្តស្នើតុលាការក្រុងភ្នំពេញ ពន្លឿននីតិវិធីក្នុងសំណុំរឿងសកម្ម​ជន​ផ្សព្វ​​​ផ្សាយ​កិច្ចព្រមព្រៀងសន្តិភាពក្រុង​ប៉ារីស លោក ស៊្រុន ស្រ៊ន និងសកម្មជនផ្សេងទៀត ដោយសារពួកគេត្រូវបានឃុំខ្លួន ១៨ខែមកហើយ ក្នុងចំណោមស្ថាន​ទម្ងន់​ទោសដែលកំពុងចោទទៅលើពួក​គេ មាន២ឆ្នាំឬ២៤ខែ ដែលការណ៍នេះបង្កើត​ជាក្តីបារម្ភថានឹងធ្វើឱ្យប៉ះពាល់ដល់សិទ្ធិនៃការឃុំខ្លួនរបស់ជនជាប់​ចោទ។

យុវជនជនជាតិដើមភាគតិចកួយ រស់​នៅ​ខេត្តស្ទឹងត្រែង គឺលោក ម៉ៅ វាសនា វ័យ ១៨ឆ្នាំ ត្រូវជាកូនប្រុសបង្កើតសកម្ម​ជន​​ការពារព្រៃឈើ លោក អ៊ុក ម៉ៅ ទាម​ទារ​រក​យុត្តិធម៌ ក្រោយពីប្រធានពន្ធនា​គារនៅខេត្តព្រះវិហារ លោក យន់ ម៉ានី និងព្រះរាជអាជ្ញារងខេត្តនេះ លោក ស្រេង វុទ្ធា បន្តឃុំខ្លួនរូបលោក លើសពេលកំណត់ ផ្ទុយពីខ្លឹមសារ​សាល​ដីកា​សាលាឧទ្ធរណ៍ត្បូងឃ្មុំ ចុះថ្ងៃទី​០៣ ខែកញ្ញា ឆ្នាំ២០២៥។

សហជីពសេរីកម្មករនៃព្រះរាជាណាចក្រកម្ពុជា (FTUWKC) ស្នើអគ្គស្នងការនគរបាល​ជាតិ ដែលជាសេនាធិការរបស់រដ្ឋាភិបាល ជំរុញការស្រាវជ្រាវ ស៊ើបអង្កេត និងកំណត់អត្តសញ្ញាណឃាតក ដែលបាញ់សម្លាប់មេដឹកនាំសហជីព លោក ជា វិជ្ជា ខណៈសំណុំរឿងឃាតកម្មនេះ មានរយៈពេល២២ឆ្នាំ ដែលគ្រួសារ​ជន​រង​គ្រោះ មិនទាន់ទទួលបានយុត្តិធម៌​នៅ​ឡើយ។

សាច់ញាតិរបស់លោក សុខ ស៊ុនណារ៉េត ស្នើសាលាឧទ្ធរណ៍ភ្នំពេញពិចារណាក្នុងការទម្លាក់បទចោទ ដោយលោកនៅតែបញ្ជាក់​ថា មិនបានប្រព្រឹត្តកំហុសដូចការ​​ចោទ​ប្រកាន់ ខណៈអគ្គព្រះរាជអាជ្ញាសាលា​ឧទ្ធរណ៍ភ្នំពេញ បានស្នើទៅតុលាការ​​​ដាក់ពិន័យលើលោក ណារ៉េត បន្ថែម​​លើការផ្តន្ទាទោសដាក់ពន្ធនាគារដែល​ធ្វើឡើងដោយសាលាដំបូងខេត្តកំពង់​ស្ពឺ។

លោក ជា ចាន់ថា សមាជិកសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ប្រចាំក្រុងបាវិត ខេត្តស្វាយរៀង ត្រូវបានដោះលែងឱ្យមានសេរីភាពវិញនៅថ្ងៃចន្ទនេះ ក្រោយអនុវត្តទោសចប់រយៈពេល១ឆ្នាំកន្លះ ឬ ១៨ខែ ដែលការណ៍នេះ អ្នកឃ្លាំមើលថា ជារឿងអយុត្តិធម៌សម្រាប់សកម្មជនសង្គមរូបនេះ ដែលចាំបាច់ត្រូវស្តារមុខមាត់ប្រព័ន្ធយុត្តិ​ធម៌ ដើម្បីបង្កើនទំនុកចិត្តដល់ប្រជាពលរដ្ឋឡើងវិញ។

ទីបំផុតទៅ រដ្ឋសភាកម្ពុជា បានអនុម័តជាឯកច្ឆន្ទលើសេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាអង្គការ​សហ​ប្រជា​ជាតិស្ដីពីនីតិសមុទ្រ ឬហៅកាត់​​ថា UNCLOS ដែលការផ្តល់សច្ចាប័ន​លើអនុសញ្ញានេះ នឹងផ្តល់ប្រយោជន៍ជាច្រើនដល់កម្ពុជា ក្នុងការការពារដែនសមុទ្រ ទៅតាមក្របខ័ណ្ឌច្បាប់អន្តរ​ជាតិ។

ការចាប់ខ្លួនជំទប់ទី២ឃុំអន្លង់វិល ខេត្តបាត់ដំបង ទាំងមិនបង្ហាញដីកា ដោយ​សារ​តែ​ការចែករំលែករឿងថៃឈ្លានពានទឹកដីខ្មែរនោះ មានការរិះគន់ថា វិធាននេះ ស្ដែងឱ្យឃើញថា រដ្ឋាភិបាលកំពុងធ្វើផ្ទុយទៅនឹងសាររបស់​ខ្លួនដែលអំពាវ​នាវ​ឱ្យ​ពលរដ្ឋខ្មែរគ្រប់​និន្នាការ រួមសាមគ្គី​ប្រឆាំងនឹងសត្រូវ​ឈ្លានពានទឹក​ដី។

ក្រុមអ្នកតស៊ូមតិកម្ពុជា ហៅ(CAT)បានចេញវិភាគថ្មីមួយ បង្ហាញថា នៅពេលដែលរដ្ឋាភិបាលបានខំប្រឹងប្រមូលផ្តុំអំណាចដាក់ក្នុងកណ្ដាប់ដៃគណបក្សកាន់អំណាចតែមួយ ប្រទាក់ក្រឡាដោយគ្រួសារនិយម ចាត់ទុកការរិះគន់គឺជាការបង្ខូចកេរ្តិ៍ឈ្មោះមេដឹកនាំ និងជំរុញឱ្យមានការប្រកួតអំណាចខ្វះសុចរិតភាព កម្ពុជាបានបាត់បង់នូវឧបករណ៍សំខាន់បំផុត ដែលមានតួនាទីមើលនិងទប់ស្កាត់កំហុសដឹកនាំជាតិ និងបាត់​ឧបករណ៍ទប់ស្កាត់គ្រោះមហន្តរាយដល់ជាតិ។