ក្នុងពិធីប្រារព្ធខួប២៩ឆ្នាំនៃព្រឹត្តិការណ៍បោក​គ្រាប់បែក ដែលធ្វើឡើងក្នុងរាជ​ធានី​ភ្នំពេញ នាថ្ងៃទី៣០ខែមីនានេះ ក្រុម​មន្ត្រីគណបក្សប្រឆាំង និយាយថា បក្សកាន់អំណាចត្រូវលុបបំបាត់វប្បធម៌​និទណ្ឌ​ភាព និងផ្សះផ្សាជាតិ ទើបជាតិ​រស់។

រដ្ឋាភិបាលលោកហ៊ុន ម៉ាណែត រងការ​រិះ​គន់​ពីអ្នកជំនាញ និងអ្នកឃ្លាំមើលនានា​ថា បានបន្តបង្កើនចំនួនមន្ត្រីនយោ​បាយ​ច្រើនហួស ដែលបង្កើតជាបន្ទុកថវិកា​ជាតិកាន់តែធ្ងន់សង្កត់ករាស្ត្រ ខុស​ពីមេដឹកនាំបណ្តាប្រទេសក្នុងតំបន់អាស៊ាន ដែលគេកំពុងធ្វើកំណែទម្រង់ ដោយ​កាត់បន្ថយចំនួនក្រសួងស្ថាប័នរដ្ឋ និងមន្ត្រី ដើម្បីកាត់បន្ថយការចំណាយរបស់រដ្ឋ។

ក្រុមអ្នកតាមដានព្រមានពីហានិភ័យអំណាចរបស់ លោក ហ៊ុន ម៉ាណែត បើនៅ​តែ​បន្តធ្វើការបង្ក្រាបបំបិទមាត់អ្នកបញ្ចេញ​មតិ ប៉ុន្តែបែរជាមិនព្រមធ្វើកំណែ​ទម្រង់ ដើម្បីដោះស្រាយវិបត្តិសង្គមដែលរីកកាន់តែធំដោយអំពើពុករលួយ និងបក្ខពួកនិយមជាប្រព័ន្ធដែលរីកកាន់​តែធំ ខណៈបច្ចុប្បន្នមានអ្នកនយោ​បាយសកម្មជនបរិស្ថាន សកម្ម​ជន​សង្គម និងអ្នកកាសែតជិត ១០០​នាក់ ត្រូវ​បានចាប់ឃុំខ្លួនទាំងអយុត្តិធម៌ដោយ​សារតែភាពសកម្មរបស់ពួកគេលើ​កិច្ចការងារសង្គម។

ការប្រើអំណាចតុលាការពីសំណាក់គណបក្សកាន់អំណាច រិតត្បិតមន្ត្រីគណបក្សក្រៅរដ្ឋាភិបាល នៅតែមានបន្ត​ជាហូរហែតាំងពីជំនាន់អតីតនាយករដ្ឋមន្ត្រី ហ៊ុន សែន ដល់លោក ហ៊ុន ម៉ាណែត។

សាលាឧទ្ធរណ៍ខេត្តបាត់ដំបង នៅថ្ងៃសុក្រនេះ លើកពេលប្រកាសសាលដីកា​លើ​អ្នកកាសែតពីររូប ដែលពួកគេត្រូវបានសាលាដំបូងខេត្តសៀមរាប ផ្តន្ទាទោសឱ្យជាប់ពន្ធនាគារ១៤ឆ្នាំ ដោយ​សារ​តែ​បង្ហោះ​រូបភាព ឈឺឆ្អាលរឿងថៃឈ្លាន​ពាន​មក​លើបូរណភាពទឹកដីខ្មែរ។

អ្នកជំនាញផ្នែកសិទ្ធិមនុស្ស និងអ្នកច្បាប់ មើលឃើញថា អំពើអយុត្តិធម៌និង​វិបត្តិ​សង្គមដែលកើតឡើងចាក់ស្រែសរីករាលដាលកាន់តែធំនាពេលបច្ចុប្បន្ន គឺដោយសារតែកម្ពុជាបានដកចេញនូវប្រព័ន្ធដឹកនាំរដ្ឋតាមបែបប្រជាធិប​​តេយ្យ ពោលគឺចាប់តាំងពីតុលាការកំពូល​ក្រោមកណ្តាប់ដៃ លោក ហ៊ុន សែន បានរំលាយចោលគណបក្សសង្គ្រោះជាតិ ដែលមានប្រជាពលរដ្ឋគាំទ្រជិតកន្លះ​ប្រទេស កាលពីចុងឆ្នាំ២០១៧ ទាំងបំពាន ធ្វើគណបក្សប្រជាជនកម្ពុជា​អាច​ជិះសេះលែងដៃ ធ្វើអ្វីៗបានតាមតែអំពើចិត្តដោយគ្មានការត្រួតពិនិត្យ។