អតិថិជនរងគ្រោះដោយសារក្រុមហ៊ុន ហួយវ័ន របស់លោក ហ៊ុន តូ បានប្រើបណ្ដាញ​សង្គមហ្វេសប៊ុកទាមទារយុត្តិធម៌ ក្រោយ​រងការបង្ក្រាបនិងចាប់ខ្លួនពីសំណាក់​អាជ្ញាធររដ្ឋ នៅពេលពួកគេចេញ​​តវ៉ា ទាមទារឱ្យក្រុមហ៊ុននេះបង្វិលសាច់​ប្រាក់​ឱ្យពួកគេវិញ ក្រោយក្រុមហ៊ុននេះ​ប្រកាសបិទទ្វារលែងដំណើរការ។

អ្នកជំនាញ អះអាងថា ការដែលអតិថិ​ជន​រងគ្រោះ ទាមទារលុយពីក្រុមហ៊ុន ហួយ​វ័ន (Huione) របស់លោក ហ៊ុន តូ ដែលបានបង្កកនោះ នឹងមិនបានអាចបានមកវិញទេ បើសិនគ្មានសម្ពាធពីអន្តរជាតិ និងការស៊ើបអង្កេតពីស្ថាប័នឃ្លាំមើលហិរញ្ញវត្ថុពិភព​លោក ដោយសំអាង​ថា លោក ហ៊ុន តូ ជាសែស្រឡាមេដឹកនាំកំពូល ដែលស្ថាប័នច្បាប់នៅកម្ពុជា​មិនហ៊ានកម្រើកនោះទេ។

សាធារណៈជន ក៏ដូចជាក្រុមអ្នកតាម​ដាន​ស្ថាន​ការណ៍សង្គម បង្ហាញចម្ងល់ថា ប៉ុន្មាន​សប្តាហ៍ចុងក្រោយនេះ ហេតុអ្វីបានមានសេចក្តីរាយការណ៍ថា កម្លាំងអគ្គស្នងការនគរបាលជាតិ ហាក់បញ្ចេញសកម្មភាពយ៉ាងសកម្ម ដើម្បីបោសសម្អាតទីតាំងនៃក្រុមឧក្រិដ្ឋកម្មឆបោកតាមប្រព័ន្ធបច្ចេកវិទ្យា ឬ Scams Online នៅក្នុងភូមិសាស្ដ្រក្រុងប៉ោយ​ប៉ែត ខេត្តបន្ទាយមានជ័យ រហូតមាន​ផ្ទុះអាវុធជាច្រើនគ្រាប់។

អ្នកឃ្លាំមើលមួយចំនួន លើកឡើងថា ពួកគេមិនជឿលើការបដិសេធរបស់ លោក កុក អាន ជាអ្នកជំនួញដ៏មានឥទ្ធិពល ដែលជាមនុស្សជំនិតរបស់ លោក ហ៊ុន សែន ប្រធានព្រឹទ្ធសភា ដែលសហរដ្ឋអាមេរិកចង្អុលមុខ និងដាក់ទណ្ឌ​កម្មចំពោះការរកឃើញថា ជាមេខ្លោង​ឧក្រិដ្ឋជនអនឡាញ និងបានព្រមាន​ថា លោកហ៊ុន សែន និងលោកហ៊ុន ម៉ាណែត អាចនឹងត្រូវសហរដ្ឋ​អាមេ​រិក​ចាប់ខ្លួន បើនៅបន្តតែឱបក្រសោបមេឧក្រិដ្ឋជនដែលមានឈ្មោះក្នុងបញ្ជីខ្មៅ​​របស់​អាមេរិក។