មន្រ្តីជាន់ខ្ពស់ក្រសួងការបរទេសអាមេរិកមួយរូប បានឱ្យដឹងនៅថ្ងៃចន្ទម្សិលមិញថា សហរដ្ឋអាមេរិក​ទទួល​បាន​ដំណឹង​ថា មានពលរដ្ឋរបស់ខ្លួននិងអ្នករស់នៅអចិន្ត្រៃយ៍ស្រប​ច្បាប់ (LPRs) ប្រមាណជា១០០​នាក់ទៀតនៅអាហ្វហ្គានីស្ថាន ដែលត្រូវតែជម្លៀសចេញពីប្រទេសនេះ។

រដ្ឋាភិបាលតាលីបង់ កាលពីថ្ងៃអាទិត្យម្សិលមិញ បានអំពាវនាវឱ្យជើងហោះហើរអន្តរជាតិនានាបន្ត​ដំណើរ​ការ​នៅ​ក្នុង​ប្រទេស​អាហ្វហ្គានីស្ថានឡើងវិញ ដោយសន្យាថានឹងផ្ដល់កិច្ចសហការពេញលេញជាមួយក្រុមហ៊ុនអាកាសចរណ៍ទាំងនោះ ខណៈដែលពួកគេលើកឡើងថា បញ្ហានៅអាកាសយានដ្ឋានកាប៊ុលត្រូវបានដោះស្រាយរួចរាល់ហើយ។

មន្រ្តីរបស់ប្រទេសកាតាមួយរូបបានឱ្យ​ដឹងថា ជើងហោះហើរពិសេសទី៤ ដែលដឹកជនស៊ីវិលពីអាហ្វហ្គានីស្ថានទៅកាន់កាតា គិតចាប់តាំងពីកងកម្លាំងអាមេរិកបានដកកាលពីខែមុន បានចាកចេញពីទីក្រុងកាប៊ុលហើយកាលពីថ្ងៃអាទិត្យម្សិលមិញ ជាមួយនឹងអ្នកដំណើរជាង២៣០នាក់ ក្នុង​នោះ​មាន​​ជ​ន​ជាតិអាហ្វហ្គានីស្ថាន ជនជាតិអាមេរិក និងជនជាតិអឺរ៉ុបផ្សេងទៀត។

មន្ត្រីកងទ័ពជើងទឹកឥណ្ឌូនេស៊ីមួយរូបបានឱ្យ​ដឹងនៅថ្ងៃព្រហស្បតិ៍ម្សិលមិញថា កងទ័ពជើង​ទឹករបស់​ប្រទេសនេះបានបង្កើនការល្បាតនៅជុំវិញទីតាំងកោះ Natuna របស់ខ្លួន ក្នុងសមុទ្រចិន​ខាងត្បូង​ បន្ទាប់ពីនាវាចិននិងអាមេរិកត្រូវបានប្រទះឃើញចូលមកក្បែរទីតាំងនោះ។