សេតវិមានបានឱ្យដឹងនៅថ្ងៃចន្ទម្សិលមិញថា ប្រធានាធិបតីសហរដ្ឋអាមេរិក លោក ចូ បៃឌិន គាំទ្រឱ្យមានការស៊ើបអង្កេតយ៉ាងហ្មត់ចត់ ចំពោះការវាយប្រហារដោយយន្ដហោះដ្រូន (drone) របស់អាមេរិក ដែលបានឆក់យកជីវិតជនស៊ីវិលអាហ្វហ្គានីស្ថានរហូតដល់ទៅ១០នាក់កាលពីខែមុន។
អ្នកនាំពាក្យសេតវិមាន លោកស្រី Jen Psaki បានឱ្យដឹងថា ការថ្លែងរបស់ប្រធានាធិបតីសហរដ្ឋអាមេរិករូបនេះ ត្រូវបានធ្វើឡើងកាលពីព្រឹកថ្ងៃសុក្រសប្ដាហ៍មុន ទាក់ទងទៅនឹងការវាយប្រហារដោយយន្ដហោះដ្រូនដែលកើតឡើងកាលពីខែសីហាកន្លងទៅ។
ទីភ្នាក់ងារសារព័ត៌មាន Reuters បានស្រង់សម្ដីលោកស្រី Jen Psaki យកមកចុះផ្សាយថា៖ «សកម្មភាពនៃការវាយប្រហារនេះ ត្រូវបានធ្វើឡើងដោយមានកំហុស។ រាល់ការបាត់បង់ គឺជាសោកនាដកម្មមួយ»។
គួរបញ្ជាក់ថា កងកម្លាំងអាមេរិក កាលពីខែសីហាកន្លងទៅ បានបើកការវាយប្រហារដោយយន្ដហោះដ្រូននៅទីក្រុងកាប៊ុល សំដៅទៅលើអ្នកបំផ្ទុះគ្រាប់បែកអត្តឃាតម្នាក់នៅក្នុងរថយន្តដែលមានបំណងវាយប្រហារមកកាន់ព្រលានយន្តហោះក្នុងទីក្រុងកាប៊ុល ដែលបានបណ្ដាលឱ្យជនស៊ីវិល១០នាក់ ក្នុងនោះមានកុមារ៧នាក់ បានស្លាប់បាត់បង់ជីវិតផងដែរ៕