ស្ថានទូតចិនប្រចាំប្រទេសកម្ពុជាបង្ហាញជំហរគាំទ្រចំណាត់ការតាមផ្លូវច្បាប់របស់កម្ពុជាទៅលើជនជាតិចិន និងអ្នកពាក់ព័ន្ធ បន្ទាប់ពីសំណង់អគារចិនមួយកន្លែងនៅខេត្តជាប់ឆ្នេរសមុទ្រកម្ពុជាបានបាក់រំលំកាលពីថ្ងៃម្សិលមិញ ដែលបានបណ្ដាលឲ្យមនុស្សរាប់ និងរបួសរាប់សិបនាក់។
តួលេខថ្មីបំផុតនៅត្រឹមល្ងាចថ្ងៃអាទិត្យនេះ បង្ហាញថា ក្រុមជួយសង្គ្រោះបានទាញសាកសពកម្មករសំណង់ដល់ទៅ ២០នាក់ហើយ ចេញពីគំនរបាក់បែកនៃអគារសំណង់មួយ ដែលគ្រោងឆ្អឹងនៃអគារត្រូវបានសាងសង់ឡើងពីដែក។ ចំណែកឯតួលេខអ្នករងរបួស នៅមានចំនួន ២៤នាក់ដដែល។
ជាងមួយថ្ងៃក្រោយហេតុការណ៍នេះ ស្ថានទូតចិនបានសរសេរនៅលើទំព័រហ្វេសប៊ុករបស់ខ្លួនថា ខ្លួនសោកស្ដាយចំពោះហេតុការណ៍នេះ និងបួងសួងឲ្យវិញ្ញាក្ខន្ធជនរងគ្រោះបានទៅកាន់សុគតិភព។
ស្ថានទូតចិនក៏បានបង្ហាញជំហរគាំទ្រផងដែរទៅដល់វិធានការរបស់អាជ្ញាធរកម្ពុជា ដែលបានចាប់ខ្លួនជនជាតិចិនដែលពាក់ព័ន្ធនឹងគម្រោងសាងសង់នៃអគារកម្ពស់ ៧ជាន់នេះ។
ស្ថានទូតចិនបានសរសេររៀបរាប់លើទំព័រហ្វេសបុកនៅល្ងាចថ្ងៃអាទិត្យនេះថា៖ «ភាគីចិនគាំទ្រស្ថាប័នពាក់ព័ន្ធរបស់កម្ពុជាបើកការស៊ើបអង្កេតតាមផ្លូវច្បាប់ និងគាំទ្រទាំងស្រុងចំពោះភាគីកម្ពុជា ដើម្បីចាត់វិធានការតាមផ្លូវច្បាប់ទៅលើជនល្មើសទាំងឡាយ ដែលពាក់ព័ន្ធក្នុងឧបទ្ទេវហេតុលើកនេះ»។
សំណង់អគារកម្ពស់ ៧ជាន់ ដែលជាគម្រោងកាន់កាប់ដោយជនជាតិចិននៅខេត្តព្រះសីហនុ បានបាក់រលំកាលពីព្រឹកទៀបភ្លឺកាលពីថ្ងៃសៅរ៍ម្សិលមិញ ហើយសាកសពមនុស្ស ២០នាក់ហើយត្រូវបានទាញចេញពីគំនរបាក់បែកនៃសំណង់អគារមួយនេះ ខណៈដែលមនុស្ស ២៤នាក់ទៀត បានរងរបួស៕
