លោក ហ៊ុន សែន បានលើកឡើងនៅល្ងាចនេះថា ការលាលែងពីដំណែងអភិបាលខេត្តព្រះសីហនុ របស់លោក យន្ត មីន បង្ហាញពីការទទួលខុសត្រូវរបស់អាជ្ញាធរនៅចំពោះមុខប្រជាពលរដ្ឋ។
លោកនាយករដ្ឋមន្រ្តី ហ៊ុន សែន បានថ្លែងបែបនេះនៅពេលដែលចុះទៅពិនិត្យដោយផ្ទាល់នូវសកម្មភាពជួយសង្រ្គោះ និងស្វែងរកជនរងគ្រោះក្នុងហេតុការណ៍បាក់អគារកម្ពស់៧ជាន់នៅខេត្តជាប់សមុទ្រមួយនេះ។
តាមរយៈការផ្សាយផ្ទាល់នៅលើទំព័រហ្វេសប៊ុក លោក ហ៊ុន សែន មានប្រសាសន៍ថា៖ «ឯកឧត្តម យន្ត មីន បានទទួលស្គាល់ ទទួលខុសត្រូវអំពីកំហុសលើការអនុវត្តសមត្ថភាព សមត្ថកិច្ចរបស់គាត់។ គាត់បានលាលែងចេញពីដំណែងជាអភិបាលខេត្ត បង្ហាញពីការទទួលខុសត្រូវរបស់អាជ្ញាធរនៅចំពោះមុខប្រជាពលរដ្ឋកម្ពុជា។»
លោក ហ៊ុន សែន នៅថ្ងៃនេះ បានយល់ព្រមឲ្យលោក យន្ត មីន លាលែងពីដំណែងជាអភិបាលខេត្តព្រះសីហនុ ក្រោយពីមានហេតុការណ៍បាក់អគារនៅក្នុងដែនសមត្ថកិច្ចរបស់ខ្លួន។ នៅថ្ងៃដដែល ព្រះបាទ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យផ្ទេរភារកិច្ច លោក គួច ចំរើន ពីអភិបាលខេត្តកំពង់ចាម ទៅកាន់ដំណែងអភិបាលខេត្តព្រះសីហនុ ជំនួសលោក យន្ត មីន។ ដោយឡែក លោក យន្ត មីន ត្រូវបានផ្ទេរទៅបម្រើការងារនៅក្រសួងមហាផ្ទៃវិញ។
តួលេខចុងក្រោយ អ្នកស្លាប់ក្នុងហេតុការណ៍នេះមានចំនួន ២៨នាក់ ខណៈអ្នករងរបួសមានចំនួន២៦នាក់។
លោក ហ៊ុន សែន បានបញ្ជាក់នៅល្ងាចនៅថា គ្រួសារអ្នកដែលបាត់បង់ជីវិតនឹងទទួលបានប្រាក់ឧបត្ថម្ភបន្ថែមជាង៦ម៉ឺនដុល្លារ ហើយជនរងគ្រោះដែលកំពុងសម្រាកព្យាបាលនឹងទទួលបាន១ម៉ឺនដុល្លារបន្ថែម៕
តាមសេចក្តីប្រកាសព័ត៌មានរបស់រដ្ឋបាលខេត្តព្រះសីហនុ ប្រតិបត្តិការរុករកជនរងគ្រោះក្នុងអគាររលំ ត្រូវបានបិទបញ្ចប់នៅត្រឹមម៉ោង៧កន្លះយប់ ថ្ងៃទី២៤ ខែមិថុនា ឆ្នាំ២០១៩នេះ។
