អាជ្ញាធរនិងមន្ត្រីសុខាភិបាលសហការជាមួយមន្ទីរធម្មការរាជធានីភ្នំពេញ បានចុះយកសំណាកព្រះសង្ឃនិងអ្នកស្នាក់នៅក្នុងវត្តប្រមាណ២ម៉ឺនអង្គ/នាក់ ដើម្បីតេស្តរកវីរុសកូវីដ-១៩ ក្រោយរកឃើញព្រះសង្ឃនិងអ្នកស្នាក់នៅវត្តមួយចំនួនឆ្លងជំងឺនេះ។
ប្រធានមន្ទីរធម្មការ និងសាសនារាជធានីភ្នំពេញ លោក ទេព គង្គា ប្រាប់ វីអូឌី នៅថ្ងៃសុក្រនេះថា ការចុះយកសំណាកព្រះសង្ឃនិងអ្នកកំពុងស្នាក់នៅតាមវត្តអារាមនានាក្នុងរាជធានីភ្នំពេញនៅពេលនេះ ធ្វើឡើងដើម្បីសុវត្ថិភាពប្រជាពលរដ្ឋ រួមទាំងបង្ការនិងទប់ស្កាត់កុំឱ្យឆ្លងរីករាលដាលជំងឺកូវីដ-១៩។
លោកបន្តថា វត្តអារាមចំនួន១៥១វត្ត ដែលមានព្រះសង្ឃនិងអ្នកស្នាក់នៅប្រមាណ២ម៉ឺនអង្គ/នាក់ ត្រូវបានអាជ្ញាធរសហការជាមួយមន្ត្រីសុខាភិបាល រួមជាមួយមន្ទីរធម្មការ បានចុះធ្វើតេស្តយកសំណាកទាំងអស់ ប៉ុន្តែចំពោះលទ្ធផលយ៉ាងណានោះ លោកនៅមិនទាន់ដឹងនោះទេ។
លោក ទេព គង្គា បន្តទៀតថា សម្រាប់វត្តអារាមដែលបានធ្វើតេស្តរួច ហើយមិនមានវិជ្ជមានកូវីដ-១៩នោះ អាជ្ញាធរនៅមិនទាន់ដឹងថាត្រូវអនុញ្ញាតបើកឱ្យប្រជាពលរដ្ឋចេញចូលវត្តវិញឬបន្តបិទនោះទេ។ ប៉ុន្តែលោកថា ប្រជាពលរដ្ឋអាចយកចង្ហាន់ប្រគេនព្រះសង្ឃតាមតំណាងវេនបិណ្ឌនីមួយៗបាន។
លោកថា៖ «វាអាស្រ័យលើជំនាញ គឺជំនាញសុខាភិបាល! ចាំមើលពួកគាត់គិតយ៉ាងម៉េច ពួកគាត់មានជំនាញខាងហ្នឹង។ ចំណែកខាងមន្ទីរធម្មការយើង គឺរង់ចាំការអនុញ្ញាតបើកឬបិទបន្ត គឺអាហ្នឹងអាស្រ័យទៅលើជំនាញ។ បើជំនាញវាយតម្លៃយល់ថាមិនសូវល្អ អាហ្នឹងយើងក៏ធ្វើតាមហ្នឹងទៀតទៅ ដើម្បីរក្សាការពារ ៣កុំ ៣ការពារ ដើម្បីរក្សាសុវត្ថិភាពរាជធានីភ្នំពេញ ទូទាំងប្រទេស និងពិភពលោក»។
ការចុះយកសំណាកនេះ ធ្វើឡើងបន្ទាប់រកឃើញមានផ្ទុះជំងឺកូវីដ-១៩នៅតាមវត្តអារាមមួយចំនួន ដូចជា វត្តជំពុះក្អែក និងវត្តនាគវ័ន្ត ក្នុងឱកាសពិធីបុណ្យកាន់បិណ្ឌ ២ថ្ងៃមកនេះ។
ព្រះតេជគុណ ថុល សុវណ្ណ គង់នៅវត្តទួលទំពូង រាជធានីភ្នំពេញ មានសង្ឃដីកាថា រដ្ឋាភិបាលនិងស្ថាប័នពាក់ព័ន្ធគួរតែធ្វើការព្យាករមុនកម្មវិធីបុណ្យ ជាជាងបើកហើយបិទវិញបែបនេះ។
ព្រះអង្គមានសង្ឃដីកាបន្តថា៖ «រដ្ឋាភិបាលដែលគាត់ប្រកាសឱ្យបិទវត្ត បញ្ឈប់សកម្មភាពពិធីបុណ្យភ្ជុំបិណ្ឌហ្នឹង វាជារឿងមួយសមហេតុផលដែរ ប៉ុន្តែអាត្មាមានទស្សនៈយល់ថា តាមពិតទៅរដ្ឋាភិបាលគួរតែពិចារណាមុននឹងកម្មវិធីមកដល់ ហើយគួរតែព្យាករថា គួរតែឱ្យបើកកម្មវិធីបុណ្យភ្ជុំបិណ្ឌឬមិនគួរឱ្យបើក មិនគួរមកបិទពាក់កណ្ដាលទីទេ គួរតែមានចំណាត់ការមុននឹងកម្មវិធីហ្នឹងមកដល់»។
កាលពីថ្ងៃទី២៣ ខែកញ្ញា ឆ្នាំ២០២១ រដ្ឋាភិបាលបានចេញសេចក្តីសម្រេចបន្ទាន់មួយ ដោយសម្រេចផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌ ចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញា ស្អែកនេះ។
ការផ្អាកនេះធ្វើឡើងដើម្បីទប់ស្កាត់ការឆ្លងជំងឺកូវីដ-១៩ ខណៈលោកនាយករដ្ឋមន្ត្រី ហ៊ុន សែន សង្កេតឃើញថា ក្នុងរយៈពេលពីរថ្ងៃនៃការរៀបចំពិធីបុណ្យកាន់បិណ្ឌនេះ មានការជួបជុំនិងប្រមូលផ្តុំមនុស្សជាច្រើននៅតាមបណ្តាវត្តអារាម ដោយមិនអនុវត្តបានត្រឹមត្រូវតាមវិធានការសុវត្ថិភាពផ្នែកសុខាភិបាល។
ករណីនេះ លោកថា ការជួបជុំនេះនឹងធ្វើឱ្យកម្ពុជាប្រឈមហានិភ័យខ្ពស់នៃការឆ្លងរាលដាលជំងឺកូវីដ-១៩ ជាទ្រង់ទ្រាយធំនៅទូទាំងប្រទេស ជាពិសេសមេរោគបំប្លែងខ្លួនថ្មីប្រភេទ ដែលតា (Delta) ដែលមានកម្រិតនៃការឆ្លងរាលដាលឆាប់រហ័ស ខណៈជំងឺនេះកំពុងឆ្លងនៅរាជធានីភ្នំពេញ និងខេត្តនានារួចទៅហើយ។
បើតាមក្រសួងសុខាភិបាល គិតត្រឹមព្រឹកថ្ងៃសុក្រនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១០៧ ៤៤១នាក់ ក្នុងនោះ អ្នកជំងឺព្យាបាលជាសះស្បើយចំនួន៩៩ ៦២៨នាក់ អ្នកស្លាប់កើនដល់ចំនួន២ ១៩៧នាក់ និងករណីនាំចូលពីក្រៅប្រទេសចំនួន១៨ ៤៣៣នាក់៕