រដ្ឋមន្រ្តីក្រសួងការបរទេសអង់គ្លេស លោកស្រី Liz Truss បានធ្វើដំណើរមកដល់ប្រទេសម៉ាឡេស៊ីហើយ នៅថ្ងៃអាទិត្យម្សិលមិញនេះ ដែលជាដំណើរទស្សនកិច្ចរយៈពេលមួយសប្ដាហ៍របស់លោកស្រី មកកាន់តំបន់អាស៊ីអាគ្នេយ៍ សំដៅពង្រឹងទំនាក់ទំនងសេដ្ឋកិច្ចនិងសន្តិសុខនៅក្នុងតំបន់។
នៅក្នុងដំណើរទស្សនកិច្ចនេះដែរ លោកស្រី Liz Truss ក៏នឹងត្រូវធ្វើដំណើរបន្តទៅកាន់ប្រទេសថៃ និងឥណ្ឌូណេស៊ី ដើម្បីឆ្លុះបញ្ចាំងពី «កំណើនសេដ្ឋកិច្ច និងទំនាក់ទំនងការទូត» របស់ពួកគេ ខណៈដែលចក្រភពអង់គ្លេសកំពុងសម្លឹងមើលពីការពង្រឹងទំនាក់ទំនងជាមួយប្រជាជាតិនិងតំបន់នានាផ្សេងទៀតក្រៅពីអឺរ៉ុប ក្រោយការចាកចេញរបស់ខ្លួនពីសហគមន៍អឺរ៉ុប (Brexit)។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្រ្តីក្រសួងការបរទេសរូបនេះ ដែលបានថ្លែងនៅក្នុងសេចក្ដីថ្លែងការណ៍មួយថា៖ «ខ្ញុំចង់កំណត់ចក្រភពអង់គ្លេសជាកន្លែងដែលមានកំណើននាពេលអនាគត និងគិតអំពីដៃគូសំខាន់ៗរបស់យើងណាខ្លះសម្រាប់ឆ្នាំតទៅមុខទៀត»។
លោកស្រីបន្តថា៖ «តំបន់អាស៊ីអាគ្នេយ៍នឹងក្លាយជាក្បាលម៉ាស៊ីននៃសេដ្ឋកិច្ចពិភពលោក ហើយខ្ញុំចង់ឱ្យចក្រភពអង់គ្លេសក្លាយជាផ្នែកមួយនៅក្នុងនោះ ដោយធ្វើឱ្យប្រសើរឡើងនូវទំនាក់ទំនងសេដ្ឋកិច្ចនិងសន្តិសុខរបស់យើងជាមួយតំបន់ ដើម្បីឆ្លុះបញ្ចាំងពីសារៈសំខាន់ដែលកំពុងតែកើនឡើង»។
ការិយាល័យរបស់លោកស្រីបន្ថែមថា លោកស្រី Liz Truss ក៏នឹងសម្លឹងមើលពីការកសាងទំនាក់ទំនងឱ្យកាន់តែជិតស្និទ្ធលើការវិនិយោគហេដ្ឋារចនាសម្ព័ន្ធចូលទៅក្នុងតំបន់ផងដែរ។
គួរបញ្ជាក់ថា លោកស្រី Liz Truss នឹងជួបជាមួយថ្នាក់ដឹកនាំនិងរដ្ឋមន្ត្រីការបរទេសនានាក្នុងប្រទេសម៉ាឡេស៊ី និងថៃ ជាមួយនឹងប្រធានបទសម្រាប់ពិភាក្សា រួមមាន កិច្ចសហប្រតិបត្តិការលើវិស័យការពារជាតិ និងពាណិជ្ជកម្ម ព្រមទាំងការវិនិយោគឌីជីថល និងបច្ចេកវិទ្យា ឱ្យកាន់តែស៊ីជម្រៅ និងកិច្ចសហការផ្នែកសន្តិសុខ។
ជាមួយគ្នានេះ លោកស្រីក៏នឹងជួបពិភាក្សាលើបញ្ហាគោលនយោបាយការបរទេស ដូចជា ករណីប្រទេសមីយ៉ាន់ម៉ា និងអាហ្វហ្គានីស្ថាន ជាមួយសមភាគីឥណ្ឌូណេស៊ី ហើយស្វែងរកទំនាក់ទំនងកាន់តែជិតស្និទ្ធលើការប្រឆាំងភេរវកម្មនិងសន្តិសុខតាមអ៊ីនធឺណិតផងដែរ៕
🇬🇧 🇲🇾 Just landed in Kuala Lumpur.
— Liz Truss (@trussliz) November 7, 2021
I’m in South East Asia to deepen links with key friends & allies in the region:
✅ Upgrading our economic and security ties
✅ Ensuring tech standards are shaped by the free world
✅ Promoting a free and secure Indo Pacific pic.twitter.com/Z4n5XWDc9X
