លោកនាយករដ្ឋមន្ត្រី ហ៊ុន សែន បានជំរុញឱ្យភាគីពាក់ព័ន្ធទាំងកម្ពុជានិងចិនធ្វើយ៉ាងណាពន្លឿនការបង្កើតរោងចក្រផលិតវ៉ាក់សាំងបង្ការជំងឺកូវីដ-១៩នៅកម្ពុជាឱ្យបានឆាប់ ដើម្បីកាត់បន្ថយការលំបាកក្នុងការដឹកជញ្ជូនជាដើម។
ការថ្លែងនេះធ្វើឡើងក្នុងឱកាសសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ ប្រវែងជិត១០០គីឡូម៉ែត្រ ក្នុងខេត្តក្រចេះ នៅព្រឹកថ្ងៃទី៧ ខែកុម្ភៈ ឆ្នាំ២០២២នេះ។
លោក ហ៊ុន សែន អះអាងនាឱកាសនោះថា នៅពេលបង្កើតរោងចក្រផលិតវ៉ាក់សាំងបង្ការកូវីដ-១៩នៅកម្ពុជាបាន នោះកម្ពុជាមិនលំបាកដឹកជញ្ជូនឆ្ងាយទៀតទេ ពោលគឺគ្រាន់តែបញ្ជាទិញតែប៉ុណ្ណោះ។
លោកថា៖ «ប្រភព [វ៉ាក់សាំង] ដែលយើងនៅតែត្រូវការបន្ត គឺប្រភពយកមកពីចិន។ ហើយសូមឱ្យខិតខំរួមគ្នាជំរុញ ដើម្បីបង្កើតមូលដ្ឋានផលិតវ៉ាក់សាំងនៅកម្ពុជា ដែលយើង [កម្ពុជា និងចិន] បាននិយាយគ្នារួចហើយ។ ធ្វើអាហ្នឹងបាននៅកម្ពុជា បានសេចក្ដីថាពេលហ្នឹងគឺយើងមានរបស់ក្នុងដៃ»។
លោក ហ៊ុន សែន បន្តថា៖ «ពិតមែនតែយើងបញ្ជាទិញពីរោងចក្រផលិតនៅកម្ពុជា ក៏ប៉ុន្តែវាមានមូលដ្ឋាននៅក្នុងប្រទេសកម្ពុជា ដោយមិនពិបាកក្នុងការដឹកជញ្ជូនពីចម្ងាយ ក្នុងការរក្សាទុក។ ទី១ គឺយើងត្រូវនាំចូលបន្ត ទាំងជំនួយឥតសំណង ទាំងការទិញ។ ទី២ ត្រូវបង្កើតនូវរោងចក្រផលិតវ៉ាក់សាំងនៅក្នុងប្រទេសរបស់យើង»។
អគ្គនាយកបច្ចេកទេសនៃក្រសួងសុខាភិបាល លោកវេជ្ជបណ្ឌិត ហុក គឹមចេង បដិសេធបកស្រាយពីព័ត៌មានពាក់ព័ន្ធទីតាំង ថវិកា និងដំណើរការនៃការដំឡើងរោងចក្រផលិតវ៉ាក់សាំងបង្ការជំងឺកូវីដ-១៩ ដោយលោកលើកឡើងថា កំពុងរង់ចាំព័ត៌មានលម្អិតពីអ្នកជំនាញ។
យ៉ាងណា លោក គឹមចេង មានប្រសាសន៍ថា កន្លងទៅ ភាគីកម្ពុជា-ចិនបានចុះកិច្ចព្រមព្រៀងជាមួយគ្នាយ៉ាងប្រញាប់រួចហើយដែរ។
លោកថា៖ «ហ្នឹងហើយរឿងកន្លងមក គឺដូចជាកាលហ្នឹងដូចប្រញេបប្រញាប់ក្នុងការចុះកិច្ចព្រមព្រៀងអីហ្នឹង ជាមួយស្ថានទូតចិនអីហ្នឹង ក្រុមហ៊ុន[ចិន]អីហ្នឹង»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា បើសិនកម្ពុជាមានរោងចក្រផលិតវ៉ាក់សាំងបង្ការកូវីដ-១៩ នោះគឺជាមុខមាត់សម្រាប់ប្រទេស។ បន្ថែមពីនេះ លោកថា អាចជួយពលរដ្ឋឱ្យទទួលបានវ៉ាក់សាំងក្នុងតម្លៃថោក ព្រមទាំងអាចជួយសេដ្ឋកិច្ចកម្ពុជាបើវ៉ាក់សាំងផលិតបានច្រើន តាមរយៈការនាំចេញនូវវ៉ាក់សាំងទៅកាន់ប្រទេសដែលពុំមានរោងចក្រផលិត។
លោក គិមអេង មានប្រសាសន៍ថា៖ «អ៊ីចឹងអាហ្នឹង [ការបង្កើតរោងចក្រផលិតវ៉ាក់សាំងបង្ការកូវីដនៅកម្ពុជា] ក៏ជារឿងសំខាន់ដែរ ដែលវាអាចឱ្យពលរដ្ឋទទួលបានតម្លៃ [វ៉ាក់សាំង] កាន់តែថោកផង ហើយក៏អាចវាជួយបង្កើនសេដ្ឋកិច្ច និងអាចបង្កើនការងារអីសម្រាប់ប្រជាជនដែរ។ បើសិនជាគេត្រូវការកម្មករនិយោជិតអីជាខ្មែរ ឬអ្នកជំនាញអីមួយចំនួនជាខ្មែរ គឺអាចនឹងមានផលប្រយោជន៍ដែរ»។
យ៉ាងណា លោកថា ចំណុចដែលកម្ពុជាគួរយកចិត្តទុកដាក់ គឺទាមទារឱ្យមានអ្នកបច្ចេកទេស ហើយប្រឹងធ្វើយ៉ាងណាគ្រប់គ្រងគុណភាពវ៉ាក់សាំង និងធ្វើយ៉ាងណាកុំឱ្យមានអំពើពុករលួយក្នុងរឿងនេះនៅគ្រប់ដំណាក់កាលទាំងអស់។
កាលពីខែធ្នូ ឆ្នាំ២០២១ លោកនាយករដ្ឋមន្ត្រី ហ៊ុន សែន បានអះអាងថា នឹងបើកដំណើរការរោងចក្រផលិតវ៉ាក់សាំងការពារជំងឺកូវីដ-១៩ ប្រភេទ «ស៊ីណូហ្វាម» របស់ប្រទេសចិននៅកម្ពុជា នាឆ្នាំ២០២២នេះ។
លោកបញ្ជាក់ពេលនោះថា រដ្ឋាភិបាលនិងក្រុមហ៊ុនផលិតវ៉ាក់សាំងរបស់ចិនបានគាំទ្រនិងយល់ព្រមផ្ដល់សិទ្ធិឱ្យកម្ពុជាសាងសង់រោងចក្រផលិតវ៉ាក់សាំង ខណៈក្រុមហ៊ុនដែលទទួលសិទ្ធិផលិតក៏បានចុះហត្ថលេខាព្រមព្រៀងហើយដែរ៕