រដ្ឋមន្ត្រីក្រសួងមហាផ្ទៃ លោក ស ខេង អំពាវនាវទៅអង្គការសង្គមស៊ីវិលចូលរួមទប់ស្កាត់ដើម្បីកុំគ្រឿងញៀនបំផ្លាញសុខភាពសាធារណៈ និងសង្គមជាតិ ខណៈអ្នកជាប់ពន្ធនាគារជិត៤០ ០០០នាក់ ក្នុងនោះជាង២០ ០០០នាក់ហើយជាប់ពាក់ព័ន្ធនឹងគ្រឿងញៀន។
ក្នុងកិច្ចប្រជុំបូកសរុបសុវត្ថិភាពចរាចរណ៍ប្រចាំឆ្នាំនៅទីស្ដីការក្រសួងសាធារណការ និងដឹកជញ្ជូន នាថ្ងៃទី៩ ខែកុម្ភៈនេះ រដ្ឋមន្ត្រីក្រសួងមហាផ្ទៃ លោក ស ខេង បានក្រើនរម្លឹកទៅអាជ្ញាធរទាំងអស់ត្រូវបន្តទប់ស្កាត់បទល្មើសគ្រឿងញៀនឱ្យដូចទប់ស្កាត់កូវីដ-១៩ដែរ ដើម្បីរួមគ្នាការពារសុវត្ថិភាពសង្គម ដោយមិនត្រូវឱ្យគ្រឿងញៀនវាយលុកនិងបំផ្លាញសុខភាពសាធារណៈឡើយ។
លោក ស ខេង បានលើកឡើងថា បញ្ហាកូវីដ-១៩អាចនឹងបាត់ទៅវិញ តែបញ្ហាសុខភាពសាធារណៈពាក់ព័ន្ធនឹងគ្រឿងញៀននេះ លោកថា ពិបាកនឹងបាត់ទៅវិញណាស់ ដោយសារបញ្ហានេះ វាជាប្រពៃណីដែលបានដឹងទាំងអស់ទៅហើយ។ លោកបង្ហាញក្ដីបារម្ភថា បច្ចុប្បន្នគ្រឿងញៀនកំពុងវាយលុកនិងបំផ្លាញសុខភាពសាធារណៈកាន់តែធ្ងន់ធ្ងរ។ ករណីនេះ លោកស្នើទៅគ្រប់ភាគីទាំងអស់សហការគ្នា ដើម្បីការពារសង្គមជាតិ។
លោកថា៖ «សូមអំពាវនាវឱ្យមានការគាំទ្រផង ប៉ុន្មានថ្ងៃនេះ មានអ្នកព័ត៌មាន NGO អង្គការក្រៅរដ្ឋាភិបាលដៃគូ អ្នកដែលមានបំណងសូមមេត្តាចូលរួម។ ក៏ចង់បានដែរការរិះគន់ ការជូនមតិយោបល់ ក៏ប៉ុន្តែទន្ទឹមនេះ ក៏ចង់បានការចូលរួមជាក់ស្ដែងដែរ អាចជួយនិងធ្វើអីបាន មិនមែនមិនចង់បានមតិយោបល់មតិរិះគន់ទេ ប៉ុន្តែយើងចង់បានការចូលរួមជាក់ស្ដែង ជួយដោះស្រាយបញ្ហាសង្គមរបស់យើង កំពុងគិតពិចារណា ប៉ុន្តែខ្ញុំជឿថា វិធានការនេះអាចទៅរួច យើងអាចធ្វើបាន»។
លោក ស ខេង បញ្ជាក់ថា ក្នុងចំណោមអ្នកជាប់ពន្ធនាគារចំនួន៣៨ ០០០នាក់ ក្នុងនោះជាង២០ ០០០នាក់ជាប់ពាក់ព័ន្ធករណីគ្រឿងញៀន ឬស្មើនឹងជាង៥៤ភាគរយ (៥៤,៥២) ពាក់ព័ន្ធគ្រឿងញៀន ដែលបច្ចុប្បន្នបានធ្វើឱ្យពន្ធនាគារជួបបញ្ហាចង្អៀតណែន ដោយសារបញ្ហាគ្រឿងញៀននេះមានទាំងអ្នករកស៊ីនិងអ្នកជក់។
រដ្ឋមន្ត្រីក្រសួងមហាផ្ទៃរូបនេះលើកឡើងថា ក្រសួងនឹងរៀបចំស្ដារនីតិសម្បទាដោយការបន្សាបគ្រឿងញៀន ដើម្បីកាត់បន្ថយភាពចង្អៀតណែននៅក្នុងពន្ធនាគារផងដែរ។
លោកថា៖ «ខ្ញុំកំពុងរកវិធីដើម្បីបន្សាប មិនដឹងបន្សាបរបៀបម៉េចទេ យើងក៏មិនដឹងដែរ! យើងត្រូវតែមានវិធានការតាមរបៀបយើងដែលអាចធ្វើទៅបាន។ ឧទាហរណ៍យកទៅដាក់កន្លែងណាមួយ រួចឱ្យធ្វើការ ធ្វើពលកម្មជាប់តែម្ដង យ៉ាងហោចណាស់បានប៉ុណ្ណឹងដែរ យើងធ្វើកើត។ អាប្រើមេដាដុងអី យើងធ្លាប់ប្រើ ហើយនឹងបន្តប្រើទៅ ក្រៅពីហ្នឹង ប្រទេសនានាក៏ដូចយើងដែរ ឱ្យធ្វើការ ធ្វើពលកម្មដាំបន្លែ ហើយ៨ម៉ោងយ៉ាងហោចណាស់។ ធ្វើទៅ កំពុងសាកល្បងគិតរឿងហ្នឹង»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង ចាត់ទុកសារអំពាវនាវរបស់រដ្ឋមន្ត្រីក្រសួងមហាផ្ទៃជារឿងល្អ ប៉ុន្តែការទប់ស្កាត់គ្រឿងញៀនមានប្រសិទ្ធភាពលុះត្រាតែរដ្ឋាភិបាលនិងអាជ្ញាធរពាក់ព័ន្ធប្ដេជ្ញាចិត្តខ្ពស់។
លោកបន្តថា សង្គមស៊ីវិលនិងប្រជាពលរដ្ឋតែងតែចូលរួមទប់ស្កាត់និងបង្ការគ្រឿងញៀន តាមរយៈការអប់រំនិងការផ្សព្វផ្សាយព័ត៌មាន ប៉ុន្តែរដ្ឋាភិបាលនិងអាជ្ញាធរពាក់ព័ន្ធត្រូវតែបើកឱ្យមានសេរីភាពបញ្ចេញមតិ និងការពារចំពោះអ្នករាយការណ៍ ដោយគ្មានការគំរាមកំហែង រួមទាំងការប្ដឹងផ្ដល់ ទើបពួកគាត់ហ៊ានផ្ដល់ព័ត៌មានទៅសមត្ថកិច្ច។
លោក យង់ គិមអេង បន្តថា បញ្ហាគ្រឿងញៀនបានបន្តវាយលុកខ្លាំង ដោយសារសមត្ថភាពនៃការទប់ស្កាត់របស់អាជ្ញាធរនៅមានកម្រិត ខណៈឈ្មួញជួញដូរគ្រឿងញៀនមានបច្ចេកទេសខ្ពស់ ហើយមធ្យោយបាយច្រើនជាងអាជ្ញាធរ ស្របពេលដែលពលរដ្ឋមិនទាន់កំណត់អំពីប្រភេទគ្រឿងញៀនបាននៅឡើយ។
លោកថា៖ «រឿងសំខាន់មួយទៀត ឧក្រិដ្ឋជនគ្រឿងញៀន គេបានដាក់គោលដៅក្រុមយុវជន។ ការដាក់គោលដៅទៅក្រុមយុវជនហ្នឹង ដែលធ្វើឱ្យក្រុមយុវជនជាអ្នកដែលរងគ្រោះផង ចែកចាយផង ឬគាត់ចាញ់បោកគេផង»។
យ៉ាងណាក៏ដោយ កាលពីថ្ងៃទី២៥ ខែមករា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង បានចេញបញ្ជាផ្ទាល់មាត់ឱ្យស្ថាប័នពាក់ព័ន្ធស្វែងរកអ្នកទទួលខុសត្រូវចំពោះការអនុញ្ញាតឱ្យក្រុមហ៊ុនមួយនាំចូលសារធាតុផ្សំជាគ្រឿងញៀនជាង១០០តោនចូលមកកម្ពុជា។
លោក ស ខេង ក៏បានប្រាប់រដ្ឋមន្ត្រីក្រសួងពាក់ព័ន្ធដែលផ្ដល់អាជ្ញាបណ្ណនាំសារធាតុផលិតគ្រឿងញៀនចូលកម្ពុជា មិនត្រូវមើលស្រាលលើបញ្ហានេះឡើយ។ បើពុំដូច្នេះទេ លោកថា រដ្ឋមន្ត្រីរូបនោះនឹងជាប់ជំពាក់នឹងការបំផ្លាញសុខភាពសាធារណៈ និងបំផ្លាញសេដ្ឋកិច្ចសង្គមថែមទៀត។
បើតាមអាជ្ញាធរគ្រឿងញៀនកម្ពុជា ធ្លាប់អះអាងប្រាប់វីអូឌីថា សារធាតុគីមីផ្សំជាគ្រឿងញៀនជាង១០០តោនដែលកម្ពុជាបង្ក្រាបបាន ត្រូវបាននាំចូលដោយក្រុមហ៊ុនចិនដែលទទួលបានអាជ្ញាបណ្ណនាំចូលមុខទំនិញចំនួន៤មុខ ប៉ុន្តែក្រុមហ៊ុននេះបាននាំចូលដល់ទៅ៨មុខ។
តែមកដល់ពេលនេះ មិនមានការឆ្លើយបំភ្លឺពីស្ថាប័នពាក់ព័ន្ធនៅឡើយ ជុំវិញការអនុញ្ញាតឱ្យនាំចូលសារធាតុគីមីផ្សំស្របច្បាប់ និងនាំចូលសារធាតុគីមីលើសពីអាជ្ញាបណ្ណក្រសួងផ្ដល់ឱ្យនោះទេ។ យោងតាមរបាយការណ៍របស់អង្គការសហប្រជាជាតិ ដើម្បីប្រយុទ្ធប្រឆាំងនឹងឧក្រិដ្ឋកម្មគ្រឿងញៀន (UNODC) ចេញផ្សាយកាលពីខែមិថុនា ឆ្នាំ២០២១ បង្ហាញថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរគ្រឿងញៀន ផលិត និងចែកចាយបន្ត៕
