រាជរដ្ឋាភិបាលជប៉ុនប្រកាសផ្ដល់ជំនួយជាហិរញ្ញប្បទានឥតសំណងប្រមាណ៤១លានដុល្លារសហរដ្ឋអាមេរិកដល់កម្ពុជា ដើម្បីអនុវត្តលើគម្រោងធំៗចំនួនពីរ រួមមាន ការបោសសម្អាតមីន និងសង្គ្រោះជនពិការដោយសារមីន ព្រមទាំងគម្រោងពង្រីកប្រព័ន្ធផ្គត់ផ្គង់ទឹកស្អាត នៅខេត្តស្វាយរៀង។
សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ កាលពីម្សិលមិញ បានឱ្យដឹងថា ពិធីចុះហត្ថលេខាលើលិខិតប្ដូរសារ និងឯកសារពាក់ព័ន្ធ ស្ដីពីការផ្ដល់ហិរញ្ញប្បទានឥតសំណងរបស់ជប៉ុន នឹងធ្វើឡើងនៅថ្ងៃទី២ ខែមីនា ឆ្នាំ២០២២ ក្រោមវត្តមានរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន និងឯកអគ្គរាជទូតជប៉ុនប្រចាំកម្ពុជា លោក មិកាមិ ម៉ាសាហ៊ីរ៉ូ (MIKAMI Masahiro)។
សេចក្ដីប្រកាសព័ត៌មានដដែលបានឱ្យដឹងថា ជំនួយឥតសំណងទាំងនោះ រួមមាន ថវិកាចំនួន២ ០០០លានយ៉េន ឬស្មើប្រមាណ១៧លានដុល្លារអាមេរិក ដើម្បីអនុវត្តគម្រោង «ការបោសសម្អាតមីនប្រកបដោយសមាហរណកម្ម និងសង្គ្រោះជនពិការដោយសារមីន ដំណាក់កាលទី២»។
ដោយឡែក ថវិកាចំនួន២ ៧៨៦លានយ៉េន ឬស្មើប្រមាណ២៤លានដុល្លារអាមេរិកទៀតនឹងត្រូវបានផ្ដល់មកកម្ពុជា ដើម្បីអនុវត្តគម្រោង «ការពង្រីកប្រព័ន្ធផ្គត់ផ្គង់ទឹកស្អាត នៅខេត្តស្វាយរៀង»។
ប្រភពដដែលបានបន្ថែមថា រដ្ឋាភិបាលជប៉ុនមានជំជឿថា ការផ្ដល់ហិរញ្ញប្បទានឥតសំណងទាំងនេះនឹងចូលរួមចំណែកយ៉ាងសំខាន់ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍសេដ្ឋកិច្ចនិងសង្គម ព្រមទាំងពង្រឹងបន្ថែមទៀតនូវកិច្ចសហប្រតិបត្តិការល្អដែលមានស្រាប់ និងចំណងមិត្តភាពជាប្រពៃណីរវាងប្រទេសទាំងពីរផងដែរ៕
