ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានថ្លែងក្រើនរម្លឹកឱ្យកងកម្លាំងសមត្ថកិច្ចពាក់ព័ន្ធទាំងអស់ត្រូវពង្រឹងការការពារសន្តិសុខ សុវត្ថិភាព និងសណ្ដាប់ធ្នាប់នៅតាមបណ្ដាស្ថានទូត និងស្ថានតំណាង ព្រមទាំងមន្ត្រីទូតនៅកម្ពុជាឱ្យបានខ្ជាប់ខ្ជួន ខណៈស្ថានភាពសង្រ្គាមរវាងរុស្ស៊ីនៅប្រទេសអ៊ុយក្រែនកាន់តែអាក្រក់។
ក្នុងឱកាសបិទសន្និបាតបូកសរុបលទ្ធផលការងារ និងលើកទិសដៅបន្តរបស់រដ្ឋបាលរាជធានីភ្នំពេញ នៅព្រឹកថ្ងៃទី៣ ខែមីនា ឆ្នាំ២០២២ លោក ស ខេង មានប្រសាសន៍ថា អាជ្ញាធរនិងកងកម្លាំងទាំងអស់ចាំបាច់ត្រូវយកចិត្តទុកដាក់ ដើម្បីធានាសុវត្ថិភាពដល់ស្ថានទូត ស្ថានតំណាងដែលមានការពាក់ព័ន្ធ ព្រមទាំងនិវេសនដ្ឋាន ឬទីស្នាក់នៅរបស់មន្ត្រីទូតក្នុងប្រទេសកម្ពុជាឱ្យបានម៉ត់ចត់។
រដ្ឋមន្ត្រីក្រសួងមហាផ្ទៃរូបនេះបន្តថា៖ «យើងមិនត្រូវមើលស្រាលចំពោះជនឱកាសនិយមឬឧក្រិដ្ឋជនដែលអាចនឹងប្រើប្រាស់ស្ថានការណ៍នេះធ្វើឱ្យមានបញ្ហាដល់ស្ថានទូត ឬស្ថានតំណាង ឬក៏បុគ្គលិក មន្ត្រីស្ថានទូត ស្ថានតំណាងទាំងនេះ ហើយជាបញ្ហាដែលយើងចាំបាច់ត្រូវយកចិត្តទុកដាក់ដើម្បីការពារសុវត្ថិភាព»។
ជាមួយគ្នានេះ លោកថា ការបន្តពង្រីកការអនុវត្តគោលនយោបាយភូមិឃុំមានសុវត្ថិភាពឱ្យបានកាន់តែមានភាពជាក់ស្ដែងនិងប្រសិទ្ធភាព ដែលជាភារកិច្ចដ៏សំខាន់និងចាំបាច់ត្រូវយកចិត្តទុកដាក់។ លោកបន្តថា គោលនយោបាយនេះ វាទាក់ទងដោយផ្ទាល់ចំពោះបញ្ហាសន្តិសុខនៅមូលដ្ឋាន ចំពោះជីវភាពរស់នៅរបស់ពលរដ្ឋផ្ទាល់តែម្តង។
លោកអះអាងថា៖ «ខ្ញុំជឿជាក់ថា ការអនុវត្តគោលនយោបាយភូមិឃុំមានសុវត្ថិភាពដោយរដ្ឋបាលរាជធានីភ្នំពេញ ឬក៏ដោយស្ថាប័នដែលមានការពាក់ព័ន្ធ គឺពិតជាផ្ដល់ផលប្រយោជន៍ដោយផ្ទាល់ដល់ប្រជាពលរដ្ឋរបស់យើងនៅក្នុងរាជធានីភ្នំពេញ ក៏ដូចជានៅទូទាំងព្រះរាជាណាចក្រកម្ពុជា»។
គិតមកដល់ថ្ងៃព្រហស្បតិ៍នេះ សង្រ្គាមដែលក្រុមប្រទេសលោកសេរីហៅថាជាការឈ្លានពានពីសំណាក់មហាអំណាចរុស្ស៊ីនៅលើប្រទេសអ៊ុយក្រែននោះ បានកើតឡើងប្រមាណសប្ដាហ៍មកហើយ ដែលបណ្ដាលឱ្យមនុស្សជាច្រើនស្លាប់និងរបួស ព្រមទាំងខូចខាតទ្រព្យសម្បត្តិយ៉ាងធ្ងន់ធ្ងរ ខណៈពលរដ្ឋអ៊ុយក្រែនរាប់សែននាក់ទៀតកំពុងរត់ភៀសខ្លួន។
ផ្អែកតាមលទ្ធផលបោះឆ្នោតដោយមហាសន្និបាតអង្គការសហប្រជាជាតិ កាលពីថ្ងៃទី២ ខែមីនា ឆ្នាំ២០២២ បង្ហាញថា កម្ពុជា រួមទាំងប្រទេសចំនួន១៤០ផ្សេងទៀត បានសម្រេចបោះឆ្នោតគាំទ្រលើដីកាដំណោះស្រាយរបស់មហាសន្និបាតអង្គការសហប្រជាជាតិដែលមានឈ្មោះថា «ការរួបរួមដើម្បីសន្តិភាព»។
ដីកាស្ដីពីដំណោះស្រាយនេះបានទទូចទាមទារឱ្យរដ្ឋាភិបាលរុស្ស៊ីបញ្ឈប់ជាបន្ទាន់នូវការប្រើប្រាស់កងកម្លាំងប្រឆាំងប្រទេសអ៊ុយក្រែន។ មិនតែប៉ុណ្ណោះ រុស្ស៊ីត្រូវតែដកកងកម្លាំងយោធារបស់ខ្លួនទាំងអស់ចេញពីទឹកដីអ៊ុយក្រែនផងដែរ៕
