សាលាដំបូងខេត្តបាត់ដំបង បានចេញដីកាកោះហៅអ្នកកាសែតម្នាក់ឱ្យចូលខ្លួនឆ្លើយបំភ្លឺជុំវិញសំណុំរឿងបរិហាកេរ្តិ៍ជាសាធារណៈ និងផ្សាយព័ត៌មានមិនពិត ក្រោយអ្នកកាសែតរូបនោះបានផ្សាយផ្ទាល់ពីសកម្មភាពដឹកជញ្ជូនឈើដែលអះអាងថា ជារបស់ឈ្មួញម្នាក់ក្នុងខេត្តនេះ។
ព្រះរាជអាជ្ញារងនៃអយ្យការអមសាលាដំបូងខេត្តបាត់ដំបងឈ្មោះ សេង ផានិត បានចេញដីការកោះហៅអ្នកកាសែត នៃទូរទស្សន៍អនឡាញអ៊ិលអេសអ៊ិន(LSN) លោក លឹម ផល្លី ឱ្យចូលខ្លួនបំភ្លឺនៅថ្ងៃទី២២ ខែមីនានេះ តាមបណ្តឹងឈ្មោះ ហេង វណ្ណដា ជុំវិញបទបរិហាកេរ្តិ៍ជាសាធារណៈ និងផ្សាយព័ត៌មានមិនពិត ដែលប្រព្រឹត្តឡើងកាលពីថ្ងៃទី១៦ ខែមករា ឆ្នាំ២០២២។
លោក លឹម ផល្លី អះអាងថា ការប្តឹងលោកនេះ កើតឡើងបន្ទាប់ពីលោកបានផ្សាយផ្ទាល់អំពីការដឹកជញ្ជូនឈើ នៅខេត្តបាត់ដំបង កាលពីថ្ងៃទី១៦ ខែមករា ឆ្នាំ២០២២ ដែលលោកអះអាងថាជាអាជីវកម្មរបស់ លោក ហេង វណ្ណដា។
លោកបញ្ជាក់ថា នឹងចូលបំភ្លឺតាមដីកាកោះរបស់តុលាការ។
លោក លឹម ផល្លី មានប្រសាសន៍ថា៖ «ខ្ញុំមានតែចូលខ្លួនបកស្រាយ ព្រោះការផ្សាយរបស់ខ្ញុំគឺខ្ញុំផ្សាយអំពីការរ៉ៃរបស់គាត់ ពិតថាគាត់មានច្បាប់មែនតែឈើរបស់គាត់ជាប្រភេទឈើព្រៃដូចជា បែង ធ្នុង សុក្រំ»។
លោក លឹម ផល្លី បន្តថា៖ «អ៊ីចឹងសូមឱ្យខាងប្រព័ន្ធច្បាប់ជួយសើបអង្កេតបន្តិចផងទៅ ព្រោះខ្ញុំក៏រងនូវសម្ពាធផ្លូវចិត្តដែរ ការប្តឹងនេះខ្ញុំខូចចិត្តខ្លាំងមែនទែន»។
លោក ផល្លី បញ្ជាក់ថា លោកចាប់ផ្តើមក្នុងវិស័យសារព័ត៌មានតាំងពីឆ្នាំ ២០១៨មកម្លេះ តែនេះជាលើកទីមួយរបស់លោកដែលទទួលការរងពាក្យបណ្តឹងបែបនេះ៕
