រដ្ឋមន្ត្រីក្រសួងមហាផ្ទៃ លោក ស ខេង បានសរសេរលិខិតផ្ញើទៅកាន់រដ្ឋមន្ត្រីក្រសួងសន្តិសុខសាធារណៈចិន និងឯកអគ្គរដ្ឋទូតចិនប្រចាំនៅកម្ពុជា ឱ្យជួយលុបបំបាត់ព័ត៌មានក្លែងក្លាយស្ដីពី «ទាសករឈាមនៅកម្ពុជា» ដោយលោកយល់ថា ជាព័ត៌មានដែលបានធ្វើឱ្យប៉ះពាល់ដល់កេរ្តិ៍ឈ្មោះរបស់កម្ពុជា។
ការលើកឡើងរបស់លោក ស ខេង បន្ទាប់ពីមានសារព័ត៌មានជាតិនិងអន្តរជាតិបានចុះផ្សាយជាបន្តបន្ទាប់ ស្ដីពីជនរងគ្រោះចិននិងថៃដែលបានអះអាងថា បានធ្លាក់ខ្លួនជាទាសករ និងត្រូវបានគេបូមឈាមលក់ បន្ទាប់ពីពួកគេបានចាញ់បោកមកធ្វើការនៅក្នុងប្រទេសកម្ពុជា ដែលមានថៅកែជាជនជាតិចិន។
ប៉ុន្តែរដ្ឋមន្ត្រីក្រសួងមហាផ្ទៃ លោក ស ខេង បានថ្លែងនៅក្នុងពិធីផ្សព្វផ្សាយរបាយការណ៍ជាតិស្ដីពីការងារប្រយុទ្ធប្រឆាំងអំពើជួញដូរមនុស្សឆ្នាំ២០២១ និងទិសដៅការងារឆ្នាំ២០២២ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅព្រឹកថ្ងៃទី៧ ខែមេសា ថាព័ត៌មានទាំងនោះជាព័ត៌មានប្រតិដ្ឋ ដែលធ្វើឱ្យខូចកិត្តិយសកម្ពុជា។
លោកថា៖ «ខ្ញុំដល់ឃើញអ៊ីចឹងទេ បានស្នើឱ្យអគ្គនគរបាល [អគ្គស្នងការនគរបាលជាតិ] បញ្ជាក់ឱ្យច្បាស់ ព្រោះរាយការណ៍ឱ្យខ្ញុំម្ដងហើយ ដល់រាយការណ៍ហើយនៅតែមានព័ត៌មានថាអ៊ីចឹងទៀត។ អ៊ីចឹងសុំបញ្ជាក់ឱ្យច្បាស់ បញ្ជាក់ហើយ គឺរឿងនៅតែប៉ុណ្ណឹង មានន័យថា ជាព័ត៌មានប្រតិដ្ឋ។ អ្នកហ្នឹងរកទៅឃើញថាចូលកម្ពុជាខុសច្បាប់ ហើយពេលមានបញ្ហាទៅដេកនៅមន្ទីរពេទ្យ គេយកឈាមទៅពិនិត្យ ធម្មតា! តែមិនអ៊ីចឹង ថាយកឈាមទៅលក់។ អ៊ីចឹងវាខូចមុខមាត់កិត្តិយសខ្មែរយើង មិនធម្មតាទេ ទម្រាំដោះស្រាយបាន តែឥលូវមិនទាន់សាបរលាបមែនទែនទេ ព្រោះនៅស្រុកយើងមិនមាននរណាផ្សាយទៀតទេ»។
អង្គការសង្គមស៊ីវិលចំនួន៣៦ បានចេញសេចក្ដីថ្លែងការណ៍មួយកាលពីថ្ងៃទី១០ ខែមីនា ដោយបានអំពាវនាវឱ្យរដ្ឋាភិបាលកម្ពុជាលុបបំបាត់អំពើទាសភាពនៅកម្ពុជា ដោយពួកគេព្រួយបារម្ភជាខ្លាំង។
សេចក្ដីថ្លែងការណ៍រកឃើញថា មានមនុស្សរាប់ពាន់នាក់ដែលភាគច្រើនជាជនបរទេស ត្រូវបានជាប់នៅក្នុងស្ថានភាពទាំងអស់នេះ។ ពួកគេត្រូវបានចាប់ជំរិត លក់ ជួញដូរ ឬត្រូវបានបោកបញ្ឆោតឱ្យទទួលបានការងារនៅក្នុងប្រទេសកម្ពុជា។ ប៉ុន្តែនៅពេលមកដល់ប្រទេសកម្ពុជា ពួកគេត្រូវបានឃុំខ្លួនក្នុងបរិវេណអគារធំៗ និងត្រូវបង្ខំឱ្យធ្វើការ ដែលជាញឹកញាប់ជាការងារទាក់ទងនឹងប្រតិបត្តិការបោកប្រាស់តាមប្រព័ន្ធអ៊ីនធឺណិត ដែលដាក់គោលដៅលើជនបរទេសរស់នៅខាងក្រៅប្រទេស។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត បានថ្លែងថា លោកមិនភ្ញាក់ផ្អើលចំពោះការបដិសេធរបស់មន្ត្រីរដ្ឋាភិបាលនោះទេ។ ក៏ប៉ុន្តែ លោកអំពាវនាវឱ្យអាជ្ញាធរកម្ពុជាពង្រឹងការអនុវត្តវិធានការច្បាប់ ដើម្បីទប់ស្កាត់រាល់បទល្មើសការជួញដូរមនុស្ស ការចាប់បង្ខាំង និងជួញដូរមនុស្ស ឱ្យមានប្រសិទ្ធភាព។
លោកថា៖ «អ៊ីចឹងខ្ញុំយល់ថា ទោះយ៉ាងណាក៏ដោយ អាជ្ញាធរកម្ពុជាត្រូវតែខិតខំពង្រឹងបន្ថែមទៀតនូវវិធានការសន្តិសុខ ដើម្បីទប់ស្កាត់នូវរាល់បទល្មើសឧក្រិដ្ឋ ឬបទល្មើសទ្រង់ទ្រាយផ្សេងៗ ដែលទាក់ទងការជួញដូរមនុស្សនៅក្នុងប្រទេសកម្ពុជា ដើម្បីឱ្យមានជំនឿទុកចិត្តសម្រាប់ភ្ញៀវទេសចរអន្តរជាតិ កុំឱ្យលេចចេញនូវព័ត៌មានដូចពេលកន្លងមក ដែលធ្វើឱ្យមានព័ត៌មានមិនល្អសម្រាប់កម្ពុជាដែលចេញទៅក្រៅហ្នឹង»។
យ៉ាងណាក្ដី លោក ស ខេង បានទទួលស្គាល់ថា បទល្មើសនៅក្នុងខេត្តព្រះសីហនុហាក់ស្ងប់ស្ងាត់ក្នុងរយៈពេលពីរសប្ដាហ៍ចុងក្រោយនេះ បន្ទាប់ពីលោកបានអំពាវនាវឱ្យមានការបង្ក្រាបបទល្មើសនៅក្នុងខេត្តជាប់មាត់សមុទ្រមួយនេះ។
កាលពីដើមខែកក្កដា ឆ្នាំ២០២១កន្លងទៅ ក្រសួងការបរទេសសហរដ្ឋអាមេរិក បានចេញផ្សាយរបាយការណ៍អង្កេតនិងវាយតម្លៃប្រចាំឆ្នាំរបស់ខ្លួន ស្តីពី «ការជួញដូរមនុស្សលើសកលលោកឆ្នាំ២០២១» ដោយបានចាត់ថ្នាក់ប្រទេសកម្ពុជា ស្ថិតនៅក្នុងបញ្ជីឃ្លាំមើលទី២ (Tier 2 Watch List)។
របាយការណ៍នេះបានចោទប្រកាន់រដ្ឋាភិបាលកម្ពុជាថាមិនបានគោរពឱ្យបានពេញលេញតាមបទដ្ឋានអប្បបរមាក្នុងការលុបបំបាត់ការជួញដូរមនុស្សនោះទេ ហើយថា អំពើពុករលួយនៅតែបន្តរារាំងដល់ការអនុវត្តច្បាប់ នីតិវិធីព្រហ្មទណ្ឌ និងការផ្ដល់សេវាដល់ជនរងគ្រោះ៕
