តំណាងជាន់ខ្ពស់សហភាពអឺរ៉ុបបានជំរុញឱ្យកម្ពុជាបញ្ចប់រឿងក្ដីលោក កឹម សុខា ដើម្បីឱ្យលោកអាចចូលរួមការបោះឆ្នោតជាតិឆ្នាំ២០២៣ខាងមុខ ដែលជាផ្នែកមួយក្នុងការស្ដារឡើងវិញនូវសិទ្ធិនយោបាយ និងដំណើរការបោះឆ្នោតតាមបែបប្រជាធិបតេយ្យនៅកម្ពុជា។
តំណាងជាន់ខ្ពស់នៃសហភាពអឺរ៉ុប ទទួលបន្ទុកកិច្ចការបរទេស និងគោលនយោបាយសន្តិសុខអឺរ៉ុប លោក Josep Borrell Fontelles បានសរសេរលើ Twitter របស់លោក បន្ទាប់ជួបលោក កឹម សុខា កាលពីថ្ងៃទី៦ ខែសីហា ឆ្នាំ២០២២ អំឡុងពេលដែលលោកមកទស្សនកិច្ចនៅកម្ពុជា ដើម្បីចូលរួមកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំផ្សេងទៀតដែលពាកព័ន្ធ នៅរាជធានីភ្នំពេញ។
លោក Josep Borrell Fontelles លើកឡើងនៅ Twitter របស់លោក ដោយជំរុញឱ្យកម្ពុជាបញ្ចប់ការកាត់ក្ដីសំណុំរឿងលោក កឹម សុខា ដែលបានអូសបន្លាយពេលយូរ ដើម្បីឱ្យលោក កឹម សុខា ចូលរួមការបោះឆ្នោតនៅឆ្នាំ២០២៣ ខាងមុខនេះ។
លោកបញ្ជាក់ថា ការបញ្ជប់សំណុំរឿងនេះជាការស្ដារឡើងវិញនូវសិទ្ធិនយោបាយរបស់លោក កឹម សុខា និងរួមចំណែកដល់ដំណើរការប្រជាធិបតេយ្យ ព្រមទាំងការបោះឆ្នោតប្រកបដោយបរិយាបន្នផងដែរ។
លោក Josep Borrell Fontelle បានសរសេរលើបណ្ដាញ Twitter ដែលមានន័យជាភាសាខ្មែរថា៖ «ខ្ញុំមានឱកាសបានជួបលោក កឹម សុខា នៅកម្ពុជា។ ដើម្បីមានលទ្ធភាពបានចូលរួមការបោះឆ្នោតនៅឆ្នាំ២០២៣ ការកាត់ក្ដីដ៏យូរអង្វែងចំពោះរូបលោក កឹម សុខា ត្រូវតែដោះស្រាយបញ្ចប់។ ការស្តារសិទ្ធិនយោបាយជូនគាត់ នឹងរួមចំណែកពេញលេញដល់ដំណើរការប្រជាធិបតេយ្យនិងការបោះឆ្នោត»។
ប្រធានគណបក្សសង្គ្រោះជាតិដែលត្រូវបានតុលាការរំលាយ លោក កឹម សុខា បានសរសេរលើហ្វេសប៊ុកផ្ទាល់ខ្លួនថា ក្នុងជំនួបកាលពីថ្ងៃទី៦ ខែសីហា កន្លងទៅ លោក Josep Borrell Fontelle បានបញ្ជាក់គោលជំហរច្បាស់លាស់របស់សហភាពអឺរ៉ុបចំពោះកម្ពុជា និងបានផ្តល់តម្លៃខ្ពស់ចំពោះការតស៊ូដោយអហិង្សា ជាពិសេសផ្តោតលើសិទ្ធិសេរីភាពរបស់លោកក្នុងការចូលរួមបម្រើប្រទេសជាតិ។
ហ្វេសប៊ុកលោក កឹម សុខា៖ «ទោះបីឯកឧត្តមតំណាងជាន់ខ្ពស់សហភាពអឺរ៉ុប និងគណៈប្រតិភូ ដែលបានអញ្ជើញមកធ្វើទស្សនកិច្ចនៅកម្ពុជាមានរយៈពេលខ្លី និងមានកិច្ចការជាច្រើនត្រូវធ្វើ ក៏ឯកឧត្តម និងគណៈប្រតិភូ បានកំណត់ក្នុងរបៀបវារៈចំណាយពេលវេលាសមរម្យជួបជាមួយខ្ញុំផ្ទាល់ ដោយបានបញ្ជាក់ពីគោលជំហរច្បាស់លាស់របស់សហភាពអឺរ៉ុបចំពោះកម្ពុជា និងបានផ្ដល់តម្លៃខ្ពស់ចំពោះការតស៊ូដោយអហិង្សា ការអត់ធ្មត់ និងជាពិសេសផ្តោតលើសិទ្ធិសេរីភាពរបស់ខ្ញុំក្នុងការចូលរួមបម្រើសង្គមជាតិ»។
វីអូឌី មិនអាចសុំការបញ្ជាក់បន្ថែមពីជំនួយការផ្ទាល់របស់លោក កឹម សុខា គឺលោក មុត ចន្ថា បានទេ នៅថ្ងៃអង្គារនេះ ខណៈសហមេធាវីរបស់លោកមួយរូប គឺលោក ផែង ហេង សុំមិនធ្វើអត្ថាធិប្បាយជុំវិញបញ្ហានេះឡើយ ក្រោមហេតុផលថាលោកមិនបានដឹង។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា សំណុំរឿងលោក កឹម សុខា ស្ថិតក្នុងដៃរបស់ស្ថាប័នតុលាការ។ ដូច្នេះ រដ្ឋាភិបាលគ្មានសិទ្ធិលូកដៃចំពោះរឿងនេះឡើយ ។
លោកថា៖ «ខ្ញុំសូមអរគុណនូវការប្រឹងប្រែងរបស់មិត្តអឺរ៉ុប និង[ដំណើរទស្សនកិច្ច]មកកាន់កម្ពុជា។ នៅក្នុងករណីពង្រឹងលទ្ធិប្រជាធិបតេយ្យដែលកម្ពុជាកំពុងតែប្រឹងប្រែងធ្វើ។ ក៏ប៉ុន្តែនៅក្នុងរឿងហ្នឹង នីតិរដ្ឋដែលយើងកំពុងប្រឹងប្រែងកំណែទម្រង់ធ្វើដែរ។ នៅក្នុងករណីរបស់លោក កឹម សុខា នេះ គឺជាករណីរបស់តុលាការ រាជរដ្ឋាភិបាលអត់មានសិទ្ធិអីលូកលាន់ ឬដាក់គំនាបលើតុលាការនោះទេ»។
ស្ថាបនិកអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ យល់ថា ប្រសិនបើសំណុំរឿងលោក កឹម សុខា មិនពាក់ព័ន្ធនឹងរឿងនយោបាយទេ ករណីនេះអាចដោះស្រាយបានយូរណាស់មកហើយ។ ដូច្នេះ រឿងលោក កឹម សុខា អាចដោះស្រាយបាន លុះត្រាតែអ្នកនយោបាយចរចាត្រូវគ្នា។
លោកថា៖ «ទោះបីជាមានការដាក់ទណ្ឌកម្មពីសហភាពអឺរ៉ុបមកលើកម្ពុជាច្រើនជាងហ្នឹងទៀត ក៏មើលឃើញថា គាត់[រដ្ឋាភិបាល]មិនមានចេតនាក្នុងការដោះស្រាយដែរ ហើយរឿងដែលអាចដោះស្រាយបាននោះ គឺមានតែច្រកមួយគត់ដែលខ្ញុំមើលឃើញនោះ គឺគណបក្សកាន់អំណាច និងភាគីអតីត CNRP ត្រូវតែចរចាគ្នា ត្រូវតែដោះស្រាយគ្នាតាមបែបនយោបាយ ទើបអាចមានដំណោះស្រាយ។ បើមិនអ៊ីចឹងទេ ខ្ញុំនៅតែមើលមិនឃើញពន្លឺ»។
ក្រៅពីតំណាងសហភាពអឺរ៉ុប កាលពីពេលថ្មីៗនេះ រដ្ឋមន្ត្រីក្រសួងការបរទេសសហរដ្ឋអាមេរិក លោក អែនតូនី ប្លីងខិន (Antony J. Blinken) ក៏បានជំរុញមេដឹកនាំកម្ពុជាឱ្យបើកលំហសិទ្ធិនយោបាយសម្រាប់លោក កឹម សុខា ព្រមទាំងលំហសេរីភាពពលរដ្ឋកម្ពុជា និងប្រជាធិបតេយ្យ មុនការបោះឆ្នោតជាតិ ឆ្នាំ២០២៣ ដោយភ្ជាប់នឹងអត្ថប្រយោជន៍មួយចំនួនសម្រាប់កម្ពុជាទៀតផង។
លោក កឹម សុខា ត្រូវបានតុលាការដកសិទ្ធិធ្វើនយោបាយជិត៥ឆ្នាំមកហើយ ក្រោយសមត្ថកិច្ចឆ្មក់ចូលចាប់ខ្លួននៅរាជធានីភ្នំពេញ កាលពីថ្ងៃទី៣ ខែកញ្ញា ឆ្នាំ២០១៧ ទាំងមានអភ័យឯកសិទ្ធិសភា ដោយចោទថា «គប់គិតជាមួយបរទេសចង់ផ្ដួលរំលំរដ្ឋាភិបាល» ប៉ុន្តែសំណុំរឿងនេះត្រូវបានគេមើលឃើញថាជារឿងនយោបាយ ហើយមកទល់ពេលនេះ លោក កឹម សុខា នៅមិនទាន់ត្រូវបានតុលាការរកឃើញថាមានទោសនៅឡើយដែរ៕