យោងតាមការចុះផ្សាយលើទំព័រហ្វេសប៊ុករបស់អគ្គនាយកដ្ឋានអន្តោប្រវេសន៍ កាលពីម្សិលមិញ ឲ្យដឹងថាសមត្ថកិច្ចខេត្តកោះកុង បានប្រទះឃើញសាកសពបុរសជនជាតិចិនម្នាក់ នៅឃុំប៉ាក់ខ្លង ស្រុកមណ្ឌលសីមា។ តាមការធ្វើកោសល្យវិច្ច័យរបស់សមត្ថកិច្ចខេត្ត ការស្លាប់នេះជាអំពើឃាតកម្ម ដែលសម្លាប់នៅតំបន់ផ្សេង ហើយយកសពមកទម្លាក់ចោលនៅកន្លែងកើតហេតុ។
អធិការស្រុកព្រះស្ដេច លោក ជ័យ សេងហ៊ាង បានប្រាប់ វីអូឌី ថា កាលពីម្សិលមិញ មានមនុស្ស៧២នាក់សង្ស័យពុលអាហារ នៅភូមិថ្កោល ឃុំបឹងដោល ស្រុកព្រះស្ដេច ខេត្តព្រៃវែង។ លោកបន្ថែមថា ក្នុងករណីនេះមិនទាន់ដឹងមូលហេតុពិតប្រាកដនៅឡើយ ដោយថា សំណាកដែលក្រសួងសុខាភិបាលយកទៅពិនិត្យមិនទាន់ទទួលបានលទ្ធផល។
យោងតាមការចុះផ្សាយលើទំព័រហ្វេសប៊ុករដ្ឋមន្ត្រីក្រសួងមហាផ្ទៃ លោក ស ខេង កាលពីម្សិលមិញឲ្យដឹងថា លោកបានជួបពិភាក្សាការងារជាមួយរដ្ឋមន្រ្តីក្រសួងសន្តិសុខសាធារណៈនៃប្រទេសឡាវ លោក វីឡែ ឡាខាំហ្វង។ រដ្ឋមន្រ្តីនៃប្រទេសទាំងពីរបានសន្យាថា នឹងខិតខំពង្រីកកិច្ចសហប្រតិបត្តិការទប់ស្កាត់ និងបង្ក្រាបបទល្មើសគ្រឿងញៀនឆ្លងដែនឲ្យកាន់តែសកម្មថែមទៀត។
សហរដ្ឋអាមេរិកបានផ្តល់ជំនួយចំនួន២លានដុល្លារអាមរិកមកដល់កម្ពុជា ដើម្បីជួយគាំទ្រសកម្មភាពដោះមីនរយៈពេលពេញ១ឆ្នាំ។ នេះបើតាមការបញ្ជាក់ពីអគ្គនាយកមជ្ឈមណ្ឌលកម្ចាត់មីនស៊ីម៉ាក់ លោក ហេង រតនា។
កងកម្លាំងទាហានប្រមាណ៣០០នាក់របស់កងពលតូចដឹកជញ្ជូនលេខ៩៩ ត្រៀមសម្រាប់ដឹកទឹកជូនប្រជាពលរដ្ឋទៅតាមបណ្ដាខេត្តមួយចំនួន ដែលប្រឈមកង្វះទឹកប្រើប្រាស់នារដូវប្រាំងឆ្នាំនេះ។
ក្រសួងរ៉ែ និងថាមពល សម្រេចព្យួរអាជ្ញាប័ណ្ណក្រុមហ៊ុនអាជីវកម្មចំនួន៦ នៅស្រុកភ្នំស្រួច ខេត្តកំពង់ស្ពឺ ចំនួន១សប្ដាហ៍ ដោយថា ជាការព្រមានដែលពួកគេមិនគោរពតាមការណែនាំរបស់ក្រសួង។
ក្រសួងមហាផ្ទៃ បានស្នើឲ្យអភិបាលរាជធានី-ខេត្តទាំងអស់ សហការជាមួយឧត្តមក្រុមប្រឹក្សាពិគ្រោះ និងផ្តល់យោបល់ នៅពេលក្រុមការងារនេះចុះបំពេញបេសកម្មការងារនៅតាមរាជធានីខេត្ត។
អាជ្ញាធរខេត្តកណ្ដាល បានរកឃើញគ្រាប់មិនទាន់ផ្ទុះដែលបន្សល់ទុកពីសម័យសង្រ្គាម ម៉ាក MK82 ជាង២០០គីឡូ នៅស្រុកកណ្ដាលស្ទឹង ។
ប្រធានាធិបតីកូរ៉េខាងត្បូង នឹងមកបំពេញទស្សនកិច្ចផ្លូវរដ្ឋរយៈពេល៣ថ្ងៃនៅកម្ពុជា ដើម្បីពង្រឹងមិត្តភាព និងបង្កើនកិច្ចសហប្រតិបត្តិការរវាងប្រទេសទាំងពីរ នាសប្តាហ៍ក្រោយនេះ។
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសចាប់ផ្ដើមដំណើរការចុះឈ្មោះអង្គបោះឆ្នោតសម្រាប់ការបោះឆ្នោតក្រុមប្រឹក្សាខេត្ត-រាជធានី និងស្រុក-ខណ្ឌ ចាប់ពីថ្ងៃនេះ។
VOD គឺជាស្ថាប័នព័ត៌មានឯករាជ្យដែលផ្តល់ព័ត៌មាន ផលិតកម្មវិធីវិទ្យុ និងការផ្សព្វផ្សាយតាមរយៈគេហទំព័រអ៊ីនធើណេត។
© ២០២២ រក្សាសិទ្ធិគ្រប់យ៉ាងដោយ ស៊ីស៊ីអាយអឹម
