អង្គការសង្គមស៊ីវិលកម្ពុជាជាង​១៨០​ស្ថាប័ន ជំរុញឱ្យសហគមន៍អន្តរជាតិ អង្គការសហប្រជាជាតិ និងអាស៊ាន ចាត់វិធាន​ការជាដុំកំភួន និងធ្វើសកម្មភាពផ្ទាល់ជាជាងប្រយោល ក្នុងការបញ្ឈប់ជាបន្ទាន់នូវសកម្មភាពសង្គ្រាមឈ្លានពានរបស់យោធាថៃ ក្នុងទឹកដីកម្ពុជា ព្រមទាំងបង្កើតក្រុមស៊ើបអង្កេតអន្តរជាតិឯករាជ្យ ដើម្បីស៊ើបអង្កេតលើការរំលោភបំពាន ការបំផ្លិចបំផ្លាញ រួមទាំងអំពើហិង្សា​ផ្លូវភេទ និងការសម្លាប់ដោយខុសច្បាប់ ពីសំណាក់ក្រុម​សមាជិកយោធា​ថៃ​មក​លើជនស៊ីវិលកម្ពុជា។

កម្ពុជា អំពាវនាវដល់មិត្តបរទេស ជាពិសេស អាមេរិក ចិន ម៉ាឡេស៊ី និងមិត្តអាស៊ាន បន្តសកម្មភាពជួយជ្រោមជ្រែងពន្លត់ភ្លើងសង្គ្រាម ដោយសារអំពើឈ្លាន​ពាន​របស់រដ្ឋាភិបាល និងយោធាថៃ មក​លើ​ដែនអធិបតេយ្យកម្ពុជា ខណៈគិតត្រឹម​ម៉ោង​៦ល្ងាចថ្ងៃទី២៤ខែធ្នូ ម្សិលមិញ ពលរដ្ឋខ្មែរស្លាប់បានកើនដល់ ៣០នាក់ របួសជិត ៩០នាក់ និងជនភៀសសឹកកើនដល់ជាង ៦៣ម៉ឺននាក់។

គិតមកដល់ត្រឹមព្រឹកថ្ងៃទី២៥ ខែធ្នូ ឆ្នាំ​២០២៥​នេះ កងទ័ពថៃនៅតែបន្តធ្វើការបាញ់ផ្លោងយ៉ាងសន្ធាប់មកលើភូមិ​សាស្ត្រ​ប្រាសាទព្រះវិហារ ធ្វើឱ្យផ្នែកខ្លះនៃប្រាសាទ​រងការខូចខាតយ៉ាងដំណំ បើ​ទោះ​​បី​ជាអង្គការយូណេស្កូបានសម្តែងការព្រួយបារម្ភយ៉ាងខ្លាំង និងកំពុងតាម​ដាន​ភាពតានតឹងនៃការប្រយុទ្ធគ្នានៅតំបន់ប្រាសាទបុរាណខ្មែរដ៏ល្បីល្បាញនេះ​ក្តី។

ចំពេលយន្តហោះចម្បាំងថៃ ឈ្លានពានកាន់​តែជ្រៅក្នុងទឹកដីខ្មែរ រួមទាំងនៅក្នុង​ខេត្តបាត់ដំបងនាពេលថ្មីៗនេះ អ្នកតាមដានជំរុញឱ្យរដ្ឋាភិបាលគ្រួសារហ៊ុន បង្ហាញសមត្ថភាពទប់ស្កាត់បន្ទាន់ ដើម្បីការពារអាយុជីវិតជនស៊ីវិលខ្មែរ កុំឱ្យបន្តស្លាប់ក្រោមការឈ្លានពានយ៉ាងកំរោលពីយោធាថៃ ខណៈមានអ្នកស្លាប់និងរបួស​កើនដល់ជាង១០០នាក់ រីឯជនភៀស​សឹក​ខ្មែរ ជាងកន្លះលាននាក់កំពុងរងគ្រោះ។

ការឈ្លានពានរបស់យោធាថៃ ឈានចូលដល់ថ្ងៃទី១៩នេះ ថៃបានបាញ់បំបុកយ៉ាង​សន្ធាប់ ព្យាយាមច្បាមយកប្រាសាទព្រះវិហារ និងទីតាំងមួយចំនួនទៀត ដើម្បី​សម្រេចមហិច្ចតាលេបទឹកដីខ្មែរ មុនការជជែកថ្នាក់រដ្ឋមន្រ្តីការពារជាតិជាថ្មីទៀត តាមយន្តការទ្វេភាគី ដែលគ្រោង​ធ្វើនៅ២ថ្ងៃខាងមុខ ពាក់ព័ន្ធនឹងការ​ជំរុញនានា ឱ្យថៃគោរពបទឈប់បាញ់។

យោធាថៃ បាននិយាយថា កិច្ចចរចា​បទ​ឈប់​បាញ់ជាមួយប្រទេសកម្ពុជា ដែលកំណត់នៅថ្ងៃទី២៤ខែធ្នូនោះ ត្រូវបានរំពឹងថានឹងបញ្ចប់ជាមួយនឹងកិច្ចប្រជុំរវាងរដ្ឋមន្ត្រីការពារជាតិនៃប្រទេសទាំងពីរ នៅថ្ងៃទី ២៧ ខែធ្នូ ខណៈដែលភាគីទាំងពីរកំពុងព្យាយាមបញ្ចប់ការប៉ះទង្គិច​ដែលអូសបន្លាយជាច្រើនសប្តាហ៍។