មេដឹកនាំកំពូលនានារបស់សហភាពអឺរ៉ុប បានឱ្យដឹងនៅថ្ងៃសុក្រនេះថា ប្រធានាធិបតីរុស្ស៊ី លោក វ្លាឌីមៀរ ពូទីន នឹងទទួលបរាជ័យ ខណៈដែលពួកគេបានអនុម័តលើការដាក់ទណ្ឌកម្មថ្មីៗជាបន្តបន្ទាប់ចំពោះការឈ្លានពានរបស់រុស្ស៊ីលើអ៊ុយក្រែន។
ការឈ្លានពានពីសំណាក់ប្រទេសរុស្ស៊ីលើអ៊ុយក្រែន បានធ្វើឱ្យតម្លៃប្រេងកាន់តែហក់ឡើងខ្ពស់សម្រាប់ការប្រើប្រាស់នៅទូទាំងពិភពលោក។ នេះបើតាមការចុះផ្សាយដោយសារព័ត៌មាន Al Jazeera។
ប្រធានាធិបតីអ៊ុយក្រែន លោក Volodymyr Zelenskiy បានធ្វើការប្ដេជ្ញានៅថ្ងៃសុក្រនេះថា រូបលោកនឹងបន្តស្នាក់នៅក្នុងទីក្រុង Kyiv ខណៈដែលកងទ័ពរបស់លោកកំពុងព្យាយាមប្រយុទ្ធពីការឈ្លានពានរបស់រុស្ស៊ី ដែលកំពុងតែឆ្ពោះមកកាន់រដ្ឋធានីមួយនេះ។
ប្រធានាធិបតីសហរដ្ឋអាមេរិក លោក ចូ បៃឌិន បានឱ្យដឹងបន្ទាប់ពីមានសំឡេងនៃការវាយប្រហារនៅទីក្រុងនានាក្នុងប្រទេសអ៊ុយក្រែន ថាសហរដ្ឋអាមេរិកនិងសម្ព័ន្ធមិត្តទាំងឡាយរបស់ខ្លួននឹងដាក់ទណ្ឌកម្មធ្ងន់ធ្ងរលើប្រទេសរុស្ស៊ី ខណៈកងកម្លាំងយោធារបស់ប្រទេសមួយនេះបានបើកការវាយប្រហារលើអ៊ុយក្រែន។
រដ្ឋមន្ត្រីការបរទេសអ៊ុយក្រែន លោក Dmytro Kuleba បានឱ្យដឹងតាមរយៈបណ្ដាញសង្គមធ្វីតធ័រ (Twitter) នៅថ្ងៃព្រហស្បតិ៍នេះថា ប្រទេសរុស្ស៊ីបានបើកការឈ្លានពានយ៉ាងពេញទំហឹងលើប្រទេសរបស់ខ្លួនហើយ ដោយពួកគេកំពុងតែកំណត់គោលដៅទៅកាន់ទីក្រុងនានាជាមួយនឹងការវាយប្រហារដោយអាវុធ។
ប្រធានាធិបតីរុស្ស៊ី លោក វ្លាឌីមៀរ ពូទីន បានឱ្យដឹងនៅថ្ងៃពុធម្សិលមិញថា រុស្ស៊ីតែងតែបើកចំហចំពោះដំណោះស្រាយការទូត ប៉ុន្តែក្នុងលក្ខខណ្ឌគិតផលប្រយោជន៍សន្តិសុខជាតិរបស់ខ្លួនជាធំ ហើយនឹងបន្តពង្រឹងវិស័យយោធារបស់ខ្លួន ដើម្បីប្រឈមមុខនឹងអ្វីដែលលោកហៅថាជាស្ថានភាពអន្តរជាតិដ៏លំបាកមួយ។
រដ្ឋមន្ត្រីការបរទេសសហរដ្ឋអាមេរិក លោក Antony Blinken បានឱ្យដឹងនៅថ្ងៃអង្គារម្សិលមិញថា ខ្លួនបានសម្រេចលុបចោលកិច្ចប្រជុំជាមួយរដ្ឋមន្ត្រីការបរទេសរុស្ស៊ី លោក Sergey Lavrov ដែលគ្រោងធ្វើឡើងនៅថ្ងៃព្រហស្បតិ៍ស្អែកនេះហើយ បន្ទាប់ពីប្រទេសមួយនេះទទួលស្គាល់តំបន់ផ្ដាច់ខ្លួនចំនួនពីរនៅភាគខាងកើតអ៊ុយក្រែនជារដ្ឋឯករាជ្យ។
រដ្ឋមន្ត្រីអង់គ្លេសមួយរូបបានឱ្យដឹងនៅថ្ងៃអង្គារ ខណៈលោកនាយករដ្ឋមន្ត្រី បូរីស ចនសុន (Boris Johnson) ដឹកនាំកិច្ចប្រជុំឆ្លើយតបបន្ទាន់មួយរបស់រដ្ឋាភិបាលជុំវិញវិបត្តិនៅអ៊ុយក្រែន ថាការលុកលុយរបស់រុស្ស៊ីលើអ៊ុយក្រែនបានចាប់ផ្ដើមហើយ ដូច្នេះអង់គ្លេសនឹងដាក់ទណ្ឌកម្មនានាលើរុស្ស៊ី។
ស្ថានទូតចិនប្រចាំនៅប្រទេសអ៊ុយក្រែន នៅថ្ងៃអង្គារនេះ បានជូនដំណឹងដល់ពលរដ្ឋនិងធុរកិច្ចទាំងឡាយរបស់ខ្លួនឱ្យចៀសវាងទៅកាន់តំបន់អស្ថិរភាពទាំងឡាយក្នុងប្រទេសអ៊ុយក្រែន ស្របពេលដែលប្រទេសមួយនេះបច្ចុប្បន្នកំពុងតែស្ថិតនៅក្នុងវិបត្តិជាមួយប្រទេសរុស្ស៊ី។
រដ្ឋមន្ត្រីក្រសួងហិរញ្ញវត្ថុជប៉ុន លោក ស៊ុនីហ្ស៊ី ស៊ុយហ្ស៊ុគី (Shunichi Suzuki) បានឱ្យដឹងនៅថ្ងៃអង្គារនេះថា ប្រទេសរបស់លោកនឹងសម្របសម្រួលជាមួយក្រុមប្រទេសមានសេដ្ឋកិច្ចជឿនលឿនទាំង៧ (G7) ក្នុងការដោះស្រាយស្ថានភាពនៅអ៊ុយក្រែន ខណៈដែលខ្លួនក៏កំពុងតែឃ្លាំមើលយ៉ាងយកចិត្តទុកដាក់ពីផលប៉ះពាល់ដែលអាចកើតមានឡើងលើសេដ្ឋកិច្ចរបស់ខ្លួន។
VOD គឺជាស្ថាប័នព័ត៌មានឯករាជ្យដែលផ្តល់ព័ត៌មាន ផលិតកម្មវិធីវិទ្យុ និងការផ្សព្វផ្សាយតាមរយៈគេហទំព័រអ៊ីនធើណេត។
© ២០២២ រក្សាសិទ្ធិគ្រប់យ៉ាងដោយ ស៊ីស៊ីអាយអឹម
