និស្សិតមួយក្រុមរៀនជំនាញផ្នែកបរិស្ថាន អំពាវនាវដល់អាជ្ញាធរពាក់ព័ន្ធបើកទូលាយសម្រាប់ការចុះកម្មសិក្សានៅតាមព្រៃសហគមន៍នានា បន្ទាប់ពីអាជ្ញាធរខេត្តកំពង់ធំរារាំងមិនឱ្យពួកគេចុះកម្មសិក្សា ក្រោមហេតុផលបង្ការការឆ្លងរាលដាលមេរោគកូវីដ-១៩ និងទាមទារលក្ខខណ្ឌផ្សេងៗទៀត។
កាលពីថ្ងៃទី២៦ ខែកញ្ញា ឆ្នាំ២០២១ និស្សិតផ្នែកបរិស្ថានមួយក្រុមបាននាំគ្នាចុះទៅទស្សនកិច្ចនៅសហគមន៍ចំនួន៣ ស្ថិតនៅស្រុកសណ្ដាន់ ខេត្តកំពង់ធំ ប៉ុន្តែពួកគេមិនបានចូលទៅដល់សហគមន៍នោះទេ។
និស្សិតដែលកំពុងសិក្សានៅសាកលវិទ្យាល័យភូមិន្ទភ្នំពេញ ផ្នែកវិទ្យាសាស្រ្តបរិស្ថាន កញ្ញា សារ៉ុន រ៉ុងសៃ បានរៀបរាប់ប្រាប់ វីអូឌី ថាពួកគាត់ដែលមានគ្នា១៨នាក់ ចុះកម្មសិក្សានៅសហគមន៍ក្បាលដូនក្រី សហគមន៍អូរដាស់ស្កូរ រួមទាំងសហគមន៍ក្បាលខ្លា ចាប់ពីថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២១។
កញ្ញាបន្តថា មុនពេលចុះទៅ ពួកគាត់ទំនាក់ទំនងមុន ហើយទទួលបានការស្វាគមន៍ពីអាជ្ញាធរឃុំនិងប្រជាសហគមន៍ តែបែរជាត្រូវអាជ្ញាធរថ្នាក់ស្រុកនិងខេត្តរារាំងទៅវិញ។
កញ្ញាបញ្ជាក់ថា៖ «យើងបានសុំការអនុញ្ញាតពីមន្រ្តីមូលដ្ឋានឃុំហើយ ជាពិសេសមានការអនុញ្ញាតពីប្រជាសហគមន៍យ៉ាងកក់ក្ដៅ ដែលពួកគាត់រីករាយស្វាគមន៍ចំពោះសិស្ស-និស្សិតចុះកម្មសិក្សាពីតំបន់ព្រៃសហគមន៍ និងការរស់នៅរបស់ប្រជាសហគមន៍ផ្ទាល់ ក៏ដូចជាព្រៃឈើដែលនៅសេសសល់ក្នុងតំបន់ព្រៃសហគមន៍»។
និស្សិតឆ្នាំទី៤ ដែលមានវ័យ២០ឆ្នាំរូបនេះបន្តថា ការចុះរារាំងពួកគាត់មិនឱ្យចូលព្រៃសហគមន៍ ដោយអាជ្ញាធរខេត្តលើកហេតុផលថា ក្រុមនិស្សិតមិនបានសុំការអនុញ្ញាតពីអាជ្ញាធរ និងការមិនឱ្យចូលព្រៃដើម្បីបង្ការកុំឱ្យមានការឆ្លងរាលដាលមេរោគកូវីដ-១៩។
កញ្ញា សារ៉ុន រ៉ុងសៃ រៀបរាប់ថា ការដែលពួកគាត់នាំគ្នាចុះទៅសហគមន៍ ដើម្បីដើរលេងកម្សាន្តផង ស្វែងយល់ពីរបៀបរស់នៅរបស់ប្រជាសហគមន៍ និងមើលពីធនធានធម្មជាតិដែលនៅសេសសល់ផង។ កញ្ញាបង្ហាញការខកចិត្ត និងមិនអាចទទួលយកបាន ដោយសារតែមានការគំរាមកំហែង និងប្រើពាក្យសម្ដីមិនសមរម្យ។
កញ្ញា រ៉ុន រ៉ុងសៃ៖ «ក្រុមអាជ្ញាធរ និងក្រុមឧទ្យានុរក្ស បានប្រើប្រាស់ពាក្យពេចន៍មិនសមរម្យដាក់យុវជន ដោយមានការគំរាមនិងគំហកខ្លាំងៗដាក់ក្រុមយុវជន»។
អភិបាលខេត្តកំពង់ធំ លោក ងួន រតនៈ បានលើកឡើងថា លោកមិនបានដឹងរឿងនេះទេ ដោយសារលោកទើបតែឡើងកាន់តំណែងថ្មីនៅក្នុងខែតុលានេះ។
លោកថា៖ «ខ្ញុំទើបតែចូលកាន់តំណែង ដូច្នេះមិនទាន់ដឹងរឿងអីទេ»។
ចំណែកប្រធានមន្ទីរបរិស្ថានខេត្តកំពង់ធំ លោក តុក កត្តា បានបដិសេធអត្ថាធិប្បាយ ដោយប្រាប់ថាជាប់ប្រជុំ។
អ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា បើក្រុមនិស្សិតទាំងនោះចង់ចុះកម្មសិក្សា ត្រូវស្នើសុំការសហការពីមន្ត្រីមូលដ្ឋាននិងមន្ត្រីជំនាញ។
លោកថា៖ «ការចូលទៅក្នុងតំបន់ការពារធម្មជាតិ ត្រូវសហការជាមួយមន្ត្រីនិងមន្ទីរជំនាញ និងបញ្ជាក់ពីមូលហេតុពិតប្រាកដនៃការចូលនោះ»។
និស្សិតជំនាញវិទ្យាសាស្ត្របរិស្ថានម្នាក់ទៀត កញ្ញា សាយ លឹមជូ ជានិស្សិតម្នាក់ក្នុងចំណោម១៨នាក់ដែលត្រូវអាជ្ញាធរខេត្តកំពង់ធំរារាំងនោះ ថ្លែងថា ជារឿងមិនត្រូវត្រឹមទេ ដែលអាជ្ញាធរតម្រូវឱ្យមានការសុំច្បាប់នោះ។
កញ្ញាថា៖ «តាមច្បាប់រដ្ឋធម្មនុញ្ញឆ្នាំ១៩៩៣ ចែងថា សេរីភាពក្នុងការដើរឆ្ងាយ ជិត និងតាំងទីលំនៅក្នុងស្ថានភាពស្របច្បាប់របស់ប្រជាពលរដ្ឋខ្មែរ ត្រូវគោរព! ហើយយើងទៅជាលក្ខណៈជាយុវជនទេ ទៅរបៀបជាបោះតង់កម្សាន្តផង ទៅរៀនសូត្រពីមជ្ឈដ្ឋានព្រៃឈើ ហើយមើលឃើញស្ថានភាពព្រៃឈើជាក់ស្ដែងនៅក្នុងសង្គមយើងផង។ គោលបំណងរបស់ក្រុមនិស្សិត ទី១ គ្រាន់តែចង់ទៅឃើញស្ថានភាពជាក់ស្ដែងព្រៃឈើក្នុងតំបន់ព្រៃសហគមន៍។ ទី២ ចង់ដឹងពីការរស់នៅរបស់ប្រជាសហគមន៍ និងការការពារព្រៃសហគមន៍ ដោយក្រុមនិសិ្សតផ្ទាល់ចង់ដឹង ចង់បានបទពិសោធន៍ក្នុងការការពារព្រៃឈើក្នុងតំបន់សហគមន៍ ដើម្បីទុកឱ្យមនុស្សជំនាន់ក្រោយ»។
កញ្ញា សាយ លឹមជូ ស្នើទៅរដ្ឋាភិបាលនិងអាជ្ញាធរពាក់ព័ន្ធឈប់រារាំងយុវជន ប្រជាពលរដ្ឋ ដែលគ្រាន់តែចុះទៅមើលព្រៃឈើបន្តទៀត ព្រោះការចុះទៅសហគមន៍ដើម្បីមើលព្រៃឈើ ជាការចូលរួមក្នុងកិច្ចការងារសង្គម បរិស្ថាន និងការពារសម្បត្តិធម្មជាតិផងដែរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ចាត់ទុកការរារាំងរបស់អាជ្ញាធរមូលដ្ឋានថា ធ្វើឡើងផ្ទុយពីរដ្ឋធម្មនុញ្ញរបស់ប្រទេសកម្ពុជាដែលបានបើកសិទ្ធិពលរដ្ឋទាំងពីរភេទ ត្រូវមានសិទ្ធិចូលរួមគ្រប់សកម្មភាពនិងកិច្ចការងារសង្គមជាដើម។
លោកបន្តថា៖ «មាត្រា៣៥ ចែងថា ពលរដ្ឋទាំងពីរភេទត្រូវមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ជាតិ ជាដើម។ អាជ្ញាធរពាក់ព័ន្ធឬអាជ្ញាធរមានសមត្ថកិច្ចក្នុងតំបន់ហ្នឹង គួរតែមានការជួយសម្រួលទៅវិញ មិនគួរណាមានការហាមឃាត់ ឬក៏រារាំងក្រុមយុវជន និងខាងពលរដ្ឋសហគមន៍នៅតំបន់ហ្នឹងទេ។ ហើយផ្ទុយទៅវិញ គឺត្រូវជួយសម្របសម្រួល ប្រសិនពួកគាត់មិនទាន់មានការរៀបចំឯកសារសុំការអនុញ្ញាត ដោយត្រូវធ្វើយ៉ាងម៉េច ដើម្បីឱ្យពួកគាត់អាចចូលទៅព្រៃសហគមន៍ ដែលពួកក្រុមយុវជនចង់ចូលសិក្សារៀនសូត្រពីព្រៃសហគមន៍ទាំងនោះ»។
នៅថ្ងៃទី១៧ ខែមិថុនា ឆ្នាំ២០២១ ស្ថានទូតសហរដ្ឋអាមេរិកប្រចាំកម្ពុជា បានផ្ដាច់ជំនួយពីរដ្ឋាភិបាលកម្ពុជា លើគម្រោង «ព្រៃឡង់បៃតង» ឆ្លើយតបនឹងវិធានការរបស់រដ្ឋាភិបាលដែលបិទខ្ទប់សំឡេងនិងសកម្មភាពសកម្មជនការពារព្រៃឈើ មិនឱ្យចូលល្បាតបទល្មើសនៅតំបន់ព្រៃឡង់ ហើយព្រៃឈើក្នុងតំបន់ការពារមួយនេះនៅបន្តរងការកាប់បំផ្លាញ៕
អត្ថបទទាក់ទង
បទវិភាគ៖ តើការចាប់ខ្លួនសកម្មជនបរិស្ថានជាបន្តបន្ទាប់ ចំណេញឬខាតសម្រាប់ជាតិ?
ការបង្ហូរទឹកស្អុយចូលសមុទ្រឬទន្លេ ការចាក់ដីលុបបឹង ទន្លេ សមុទ្រ ការបូមខ្សាច់យ៉ាងអនាធិបតេយ្យ ដែលធ្វើឱ្យប៉ះពាល់បរិស្ថានឬបាក់ច្រាំងទន្លេ ការសាងសង់សណ្ឋាគាររំលោភដីឆ្នេរសមុទ្រ ការទន្ទ្រានដីព្រៃកោងកាង ការកាប់បំផ្លាញព្រៃឈើនៅតំបន់ការពារ បញ្ហាអំពើពុករលួយ បញ្ហាសំរាម ជាដើម ដែលបញ្ហាទាំងនេះ មានយុវជនតិចតួចណាស់ហ៊ានចេញមុខនិយាយការពិតឬរិះគន់ ដើម្បីឱ្យរដ្ឋាភិបាលចាត់វិធានការដោះស្រាយសម្រាប់ជាប្រយោជន៍ជាតិទៅថ្ងៃអនាគត។
