រដ្ឋមន្ត្រីក្រសួងមហាផ្ទៃបានឱ្យដឹងថា ក្រសួងមួយនេះបានស្នើទៅរដ្ឋាភិបាលសុំតាក់តែងសេចក្ដីព្រាងច្បាប់ថ្មីមួយសម្រាប់គ្រប់គ្រងសារធាតុគីមីផ្សំដែលនាំចូលមកកម្ពុជា ដើម្បីទប់ស្កាត់កុំឱ្យមានការលួចកែច្នៃសារធាតុគីមីផ្សំទាំងនោះទៅជា«គ្រឿងញៀន»នៅកម្ពុជា។
ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សា ហ៊ុន សែន ថ្នល់ទទឹង, សាលារៀនខ្មែរ-ចិន ចេង ម៉េង និងសមិទ្ធផលនានា ស្ថិតនៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្ដាល កាលពីចុងសប្ដាហ៍មុន រដ្ឋមន្ត្រីក្រសួងមហាផ្ទៃ លោក ស ខេង ឱ្យដឹងថា ច្បាប់គ្រប់គ្រងសារធាតុផ្សំនេះ គឺបានន័យថា គ្រប់គ្រងតាំងពីការផ្ដល់អាជ្ញាបណ្ណនាំចូល។ លើសពីនេះ គ្រប់គ្រងចរាចរណ៍សារធាតុផ្សំទាំងនោះ ដើម្បីធានាដល់ការទៅប្រើប្រាស់តាមរោងចក្រ ឬប្រើប្រាស់ឱ្យបានត្រឹមត្រូវ ចៀសវាងប្រើប្រាស់សារធាតុគីមីទាំងនោះសម្រាប់ផ្សំជាគ្រឿងញៀនបន្តទៀត។
លោកថា៖ «ឥលូវនេះ ខ្ញុំស្នើទៅប្រមុខរាជរដ្ឋាភិបាល ដើម្បីស្នើធ្វើច្បាប់មួយពីការគ្រប់គ្រងសារធាតុផ្សំហ្នឹង ពីព្រោះសារធាតុផ្សំហ្នឹង ជួនអីគេដាក់មកថា យកមកធ្វើជាវត្ថុនេះ វត្ថុនោះ សម្ភារប្រើប្រាស់នេះ ប្រើប្រាស់នោះ តែធាតុពិតយកមក គឺថាយកផ្សំគ្រឿងញៀន នេះហើយជាបញ្ហា»។
ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃរូបនេះ សង្កត់ធ្ងន់អំពីបញ្ហាគ្រឿងញៀននៅកម្ពុជា ដោយថា នៅពេលបច្ចុប្បន្ន កម្ពុជាកំពុងប្រឈមនឹងកំណើនគ្រឿងញៀនចេញពីការកែច្នៃដោយសមាសធាតុគីមីផ្សេងៗកាន់តែច្រើន។
លោកបន្ថែមថា បញ្ហាគ្រឿងញៀននេះក៏មានជាប់ពាក់ព័ន្ធនឹងបទល្មើសសម្អាតប្រាក់ អំពើភេរវកម្ម និងការរីកសាយភាពអាវុធមហាប្រល័យថែមទៀតផង។
ថ្លែងក្នុងពិធីនោះ លោក ស ខេង បន្ថែមថា សញ្ញានៃការចរាចរគ្រឿងញៀននៅតាមខេត្ត យ៉ាងហោចណាស់៥ខេត្តក្នុងមួយថ្ងៃ និងនៅទូទាំងប្រទេសមានទោះតិចឬច្រើន។ ហើយករណីគ្រឿងញៀន សមត្ថកិច្ចបានបង្រ្កាបច្រើនណាស់ នៅតាមរោងចក្រ និងក្នុងឃ្លាំង រាប់រយតោនថែមទៀត។
លោកថា៖ «យើងបានបង្រ្កាបច្រើនណាស់ មិនមែនតិចទេ។ គ្រឿងញៀននេះ យើងបានបង្ក្រាបច្រើនជាងគេបង្អស់ រាប់រយតោន! ហើយកំពង់ស្ពឺ នៅជាប់យើងនេះ គឺសារធាតុគេយកមកផ្សំជាគ្រឿងញៀននេះ នៅនឹងរោងចក្រ នៅនឹងឃ្លាំង ដែលយើងរឹបអូស រាប់រយតោន»។
ជាមួយគ្នានេះ លោក ស ខេង ក៏បានស្នើឱ្យមានការចូលរួមប្រយុទ្ធប្រឆាំងគ្រឿងញៀន ដើម្បីកុំឱ្យគ្រឿងញៀនវាយលុកក្នុងសហគមន៍កាន់តែអាក្រក់បន្ថែមទៀត ជាពិសេសឪពុកម្តាយឬអាណាព្យាបាលក៏ត្រូវចូលរួមផងដែរ។
ជុំវិញបញ្ហាគ្រឿងញៀននេះដែរ អាណាព្យាបាលមួយចំនួនបានបង្ហាញក្ដីបារម្ភពីវាសនាកូនៗរបស់ពួកគេ ប្រសិនបើបញ្ហានេះមិនត្រូវបានទប់ស្កាត់ឱ្យមានប្រសិទ្ធភាព។
លោក ស៊ុត សាអូន ជាអាជីវករលក់បាយមួយរូបនៅរាជធានីភ្នំពេញ បានឱ្យដឹងថា សព្វថ្ងៃ លោកបារម្ភពីការចរាចរគ្រឿងញៀននៅកម្ពុជា។ ក្ដីបារម្ភនេះ ដោយសារលោកមានកូនប្រុសដែលកំពុងស្ថិតក្នុងវ័យសិក្សា ហើយក៏ជាវ័យមួយដែលចង់សាកល្បងអ្វីថ្មី។ លោកបារម្ភខ្លាចកូនរបស់លោកប្រព្រឹត្តខុសផ្លូវ ពាក់ព័ន្ធនឹងគ្រឿងញៀន ដោយលោកសង្កេតឃើញថា ការបង្ក្រាបបានគ្រឿងញៀនក្នុងរយៈពេលចុងក្រោយនេះ កាន់តែមានចំនួនច្រើនគួរឱ្យកត់សម្គាល់។
លោកថា៖ «នរណាក៏បារម្ភ ដែលជាឪពុកម្ដាយ រឿងគ្រឿងញៀនហ្នឹង! ខ្លាចកូនសេពគប់មិត្តមិនល្អ នាំទៅសេពគ្រឿងញៀន។ ពិបាកដែរ ព្រោះឥលូវគ្រឿងញៀនចរាចរច្រើន តាមឃើញសព្វថ្ងៃ និងដឹងតាមព័ត៌មានគេចាប់បាន សូម្បីតាមកន្លែងស្ងាត់ៗលួចលក់ច្រើនណាស់»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បារម្ភចំពោះករណីគ្រឿងញៀននេះ ដោយថា ជាបញ្ហាដ៏ធំមួយក្នុងសង្គម ដែលបង្កផលប៉ះពាល់យ៉ាងធ្ងន់ធ្ងរទៅថ្ងៃអនាគត។ បន្ថែមពីនេះ ក៏ជាកង្វល់មួយពាក់ព័ន្ធនឹងការលាងលុយដែលបានពីគ្រឿងញៀននេះដែរ ខណៈអន្ដរជាតិកំពុងប្រយុទ្ធប្រឆាំងលើបញ្ហានេះ។
លោក យង់ គិមអេង លើកឡើងថា នៅកម្ពុជាមានកុមារនិងយុវជនជាច្រើនរងគ្រោះដោយសារគ្រឿងញៀន ដែលទាមទារឱ្យរដ្ឋាភិបាលត្រូវចាត់វិធានការឱ្យមានប្រសិទ្ធភាព។
សង្គមស៊ីវិលរូបនេះឱ្យដឹងទៀតថា ដើម្បីទប់ស្កាត់បញ្ហាគ្រឿងញៀននេះ រដ្ឋាភិបាលត្រូវអប់រំដល់ពលរដ្ឋឱ្យចេះកំណត់ដឹងពីសញ្ញាណនៃគ្រឿងញៀន ហើយអាជ្ញាធរត្រូវពង្រឹងការអនុវត្តច្បាប់បន្ថែមទៀត ពិសេសត្រូវរកអ្នកពាក់ព័ន្ធឬជននៅពីក្រោយខ្នង ដើម្បីយកមកផ្តន្ទាទោស។
លោកលើកឡើងថា៖ «ខ្ញុំសុំឱ្យអាជ្ញាធរពាក់ព័ន្ធទាំងអស់ យើងមិនត្រូវបន្ធូរដៃចំពោះបញ្ហាគ្រឿងញៀននេះទេ បាទ! ត្រូវចាត់វិធានការឱ្យបានក្ដៅគគុកហើយជាប់ជាប្រចាំ ដើម្បីធានាភូមិឃុំរបស់យើងមានសុវត្ថិភាព ដើម្បីធានាប្រជាពលរដ្ឋ ជាពិសេសយុវជន ហើយនិងកុមារកម្ពុជា មិនទទួលរងគ្រោះតទៀត»។
បើតាមទំព័រហ្វេសប៊ុកផ្លូវការរបស់មន្ទីរប្រឆាំងគ្រឿងញៀន (Anti-Drug Department) កាលពីថ្ងៃទី២៤ ខែកក្កដា បានឱ្យដឹងថា កាលពីទី២១ ខែកក្កដា ឆ្នាំ២០២២ សមត្ថកិច្ចជំនាញអង្គភាពមួយនេះបានបង្ក្រាបករណីជួញដូរគ្រឿងញៀននៅរាជធានីភ្នំពេញ ដោយចាប់ខ្លួនជនសង្ស័យជាជនជាតិចិនម្នាក់ និងរឹបអូសគ្រឿងញៀនជាង៤៥គីឡូក្រាម។
នៅថ្ងៃដដែលនោះ នគរបាលប្រឆាំងគ្រឿងញៀន ក៏បានបង្ក្រាបករណីជួញដូរគ្រឿងញៀន ដោយចាប់ខ្លួនជនសង្ស័យម្នាក់ជាជនជាតិខ្មែរ និងរឹបអូសគ្រឿងញៀនជាង៥២គីឡូក្រាម នៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
ប្រភពដដែលឱ្យដឹងទៀតថា កាលពីថ្ងៃទី១៣ ដល់ថ្ងៃទី១៥ ខែកក្កដា សមត្ថកិច្ចជំនាញនៃមន្ទីរប្រឆាំងគ្រឿងញៀន ក៏បានចាប់ខ្លួនជនសង្ស័យជាជនជាតិខ្មែរ ថៃ និងវៀតណាម ចំនួន១១នាក់ ព្រមទាំងរឹបអូសគ្រឿងញៀនជាង៤៤គីឡូក្រាម។
មន្ទីរប្រឆាំងគ្រឿងញៀនដដែលក៏បានឱ្យដឹងពីករណីធំមួយទៀតដែលកើតឡើងនៅខែកក្កដានេះដែរ គឺករណីសមត្ថកិច្ចបង្ក្រាបករណីទីន្លែងកែច្នៃផលិតគ្រឿងញៀនទ្រង់ទ្រាយធំនៅ៤ទីតាំង រួមមាន នៅរាជធានីភ្នំពេញ ស្វាយរៀង ព្រៃវែង និងខេត្កណ្តាល។
ការបង្ក្រាបនេះធ្វើឡើងចន្លោះពីថ្ងៃទី៤ ដល់ថ្ងៃទី៩ ខែកក្កដា ឆ្នាំ២០២២ ដោយសមត្ថកិច្ចជំនាញចាប់ខ្លួនជនជាតិចិនចំនួន១១នាក់ ហើយរឹបអូសសារធាតុញៀនជិត២តោន (១,៨០តោន) និងសារធាតុគីមីសម្រាប់ផ្សំជាគ្រឿងញៀនជាង២៧៦តោន៕