សមត្ថកិច្ចជំនាញបានឃាត់ខ្លួនមន្ត្រីកងរាជអាវុធហត្ថខេត្តកំពង់ធំចំនួន២នាក់ ក្នុងករណីចុះបង្រ្កាបទីតាំងល្បែងស៊ីសងអនឡាញមួយកន្លែង បណ្ដាលឱ្យមនុស្សម្នាក់ស្លាប់ ក្រោយក្រុមការងារចំពោះកិច្ចរបស់កងរាជអាវុធហត្ថលើផ្ទៃប្រទេសបានធ្វើការស៊ើបអង្កេត។
សេចក្ដីប្រកាសព័ត៌មានរបស់កងរាជអាវុធហត្ថលើផ្ទៃប្រទេស នៅថ្ងៃទី១៦ ខែសីហា ឆ្នាំ២០២២នេះ ឱ្យដឹងថា ក្រោយពីក្រុមការងារចំពោះកិច្ចបានធ្វើការស្រាវជ្រាវ និងស៊ើបអង្កេតតាមនីតិវិធីរួចមក ជុំវិញករណីចុះបង្រ្កាបទីតាំងល្បែងស៊ីសងអនឡាញមួយកន្លែង ដែលបណ្ដាលឱ្យជនសង្ស័យម្នាក់ស្លាប់ ដោយមន្រ្តីជំនាញនគរបាលយុត្តិធម៌បានសុំគោលការណ៍ឃាត់ខ្លួនយោធិននៃកងរាជអាវុធហត្ថខេត្តកំពង់ធំ ចំនួន២នាក់ ក្នុងនោះមាននាយការិយាល័យព្រហ្មទណ្ឌ លោក សុខ ម៉េងហុង និងប្រធានអង្គភាពនគរបាលយុត្តិធម៌ លោក លុយ តាំងឈូយ។
តែយ៉ាងណា សេចក្ដីប្រកាសព័ត៌មានមិនបានបញ្ជាក់លម្អិតជុំវិញលទ្ធផលនៃការស៊ើបអង្កេតនោះនៅឡើយ ដោយថា កងរាជអាវុធហត្ថលើផ្ទៃប្រទេស នឹងធ្វើសន្និសីទសារព័ត៌មាន ដើម្បីបញ្ជាក់អំពីលទ្ធផលនៃការស៊ើបអង្កេតករណីបង្ក្រាបល្បែងស៊ីសងខុសច្បាប់ (ជល់មាន់តាមអនឡាញ) និងការស្លាប់ជនសង្ស័យម្នាក់ឈ្មោះ សួង ឌ័ន នៅព្រឹកថ្ងៃទី១៧ ខែសីហា ឆ្នាំ២០២២ ក្នុងសាលប្រជុំនៃបញ្ជាការដ្ឋានកងរាជអាវុធហត្ថខេត្តកំពង់ធំ ស្ថិតនៅភូមិក្ដី សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។
យ៉ាងណាមិញ កញ្ញា ឌិន នារតី ដែលអះអាងថាជាកូនបង្កើតរបស់លោក សួង ឌ័ន អនុប្រធានភូមិដែលបានស្លាប់នោះ ឱ្យដឹងថា មកទល់ពេលនេះ កញ្ញានៅមិនទាន់ដាក់ពាក្យបណ្ដឹងទៅតុលាការនៅឡើយទេ ដោយនៅរង់ចាំស្ដាប់លទ្ធផលសិន។ កញ្ញាបញ្ជាក់ថា ប្រសិនបើយុត្តិធម៌នៅមិនទាន់ទទួលបានពេញលេញនោះ កញ្ញានឹងដាក់ពាក្យបណ្ដឹងទៅតុលាការ។
កញ្ញាថា៖ «នៅទេបង! [មិនទាន់ដាក់ពាក្យបណ្ដឹង] ព្រោះខ្ញុំនៅចាំស្ដាប់លទ្ធផលសិន។ បើលទ្ធផល ខ្ញុំនៅតែទទួលយុត្តិធម៌មិនបានពេញលេញ គឺខ្ញុំដាក់ពាក្យបណ្ដឹង»។
បើតាមកងរាជអាវុធហត្ថលើផ្ទៃប្រទេស កាលពីថ្ងៃទី០៧ ខែសីហា ឆ្នាំ២០២២ កងរាជអាវុធហត្ថខេត្តកំពង់ធំ ដោយមានការសម្របសម្រួលពីព្រះរាជអាជ្ញារងអមសាលាដំបូងខេត្ត បានចុះបង្ក្រាបទីតាំងលេងល្បែងស៊ីសងអនឡាញខុសច្បាប់មួយកន្លែង ដោយក្នុងនោះបានឃាត់ខ្លួនមនុស្សចំនួន៤នាក់ រួមនឹងវត្ថុតាងមួយចំនួនទៅកាន់បញ្ជាការដ្ឋានកងរាជអាវុធហត្ថខេត្ត។ ប៉ុន្តែក្នុងពេលធ្វើដំណើរនោះ ជនសង្ស័យម្នាក់ឈ្មោះ សួង ឌ័ន បានស្លាប់។
ជុំវិញករណីនេះដែរ ហ្វេសប៊ុកឈ្មោះ «Nearadey Din» បានបង្ហោះថា លោក សួង ឌ័ន អាយុ៤៧ឆ្នាំ ដែលត្រូវជាឪពុករបស់ខ្លួន បានស្លាប់ដោយសារប៉េអឹមបានចាប់ខ្លួនគាត់ ហើយសង្កត់នៅត្រង់ក ដែលធ្វើឱ្យគាត់ដកដង្ហើមមិនរួច នៅពេលដែលគាត់កំពុងជ្រកភ្លៀងនៅតូបកាហ្វេមួយកន្លែង។
ក្រោយហេតុការណ៍នេះ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា បានបញ្ជាឱ្យបង្កើតក្រុមការងារចំពោះកិច្ចមួយ ដើម្បីពិនិត្យនិងស្រាវជ្រាវជុំវិញភាពមិនប្រក្រតីក្នុងការប្រតិបត្តិតួនាទីភារកិច្ច ពាក់ព័ន្ធនឹងករណីមន្ត្រីកងរាជអាវុធហត្ថខេត្តកំពង់ធំនេះ៕