សមាជិកសភាមួយរូបមកពីគណបក្សសេរីនិយម លោកស្រី Judy Sgro បានឱ្យដឹងកាលពីថ្ងៃពុធកន្លងទៅថា ប្រតិភូមួយក្រុមនៃសមាជិកសភាកាណាដា គ្រោងនឹងធ្វើដំណើរទស្សនកិច្ចទៅកាន់កោះតៃវ៉ាន់ ក្នុងខែតុលាខាងមុខនេះ ដើម្បីស្វែងរកឱកាសពាណិជ្ជកម្មនានានៅក្នុងតំបន់អាស៊ីប៉ាស៊ីហ្វិក ខណៈសកម្មភាពនេះត្រូវបានមើលឃើញថា អាចនឹងបង្កភាពតានតឹងបន្ថែមទៀតដល់ទំនាក់ទំនងរវាងចិន និងលោកខាងលិច។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទំនាក់ទំនងរវាងចិន និងលោកខាងលិច បាននិងកំពុងធ្លាក់ចុះរួចមកហើយ គិតចាប់តាំងពីប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) បានធ្វើដំណើរទៅកាន់កោះតៃវ៉ាន់ កាលពីដើមខែសីហាកន្លងទៅ ជាដំណើរទស្សនកិច្ចមួយដែលត្រូវបានចាត់ទុកដោយក្រសួងការពារជាតិចិនថា ជាការរំលោភលើអធិបតេយ្យភាព និងបូរណភាពទឹកដីរបស់ចិន។
ទាក់ទិននឹងករណីនេះ ចិនក៏បានធ្វើការឆ្លើយតបតាមរយៈការធ្វើសមយុទ្ធយោធានានា ដែលក្នុងនោះរួមមាន ការដាក់ពង្រាយយន្តហោះចម្បាំង ការបាញ់មីស៊ីលផ្លោងនៅលើដែនទឹក និងដែនអាកាស ជុំវិញដែនកោះតៃវ៉ាន់ផងដែរ។
ទោះជាយ៉ាងណា លោកស្រី Judy Sgro បានបញ្ជាក់ប្រាប់ទីភ្នាក់ងារសារព័ត៌មាន Reuters ឱ្យដឹងថា៖ «គោលបំណង [នៃដំណើរទស្សនកិច្ច] គឺមិនមែនរំខាន និងបង្កជាបញ្ហាអ្វីដល់តៃវ៉ាន់ ឬចិននោះទេ។ ដំណើរទស្សនកិច្ចនេះ គឺទាក់ទងនឹងពាណិជ្ជកម្ម មិត្តភាព ក៏ដូចជាឱកាសសម្រាប់កាណាដា នៅក្នុងតំបន់អាស៊ីប៉ាស៊ីហ្វិកទាំងមូលប៉ុណ្ណោះ»។
ទាក់ទិននឹងករណីនេះ លោកស្រីបន្ថែមថា សមាជិកសភាកាណាដា កាលពីពេលកន្លងទៅ គឺតែងតែទៅកាន់កោះតៃវ៉ាន់ ដែលធ្វើឡើងពីរដងក្នុងមួយឆ្នាំ ដែលពួកគេទើបតែផ្អាកក្នុងរយៈពេលចុងក្រោយនេះ ដោយសារតែករណីឆ្លងរីករាលដាលនៃវីរុសកូវីដ-១៩។
សមាជិកសភាកាណាដាដដែលបន្តថា៖ «សកម្មភាពនេះក៏ជាផ្នែកមួយនៃកិច្ចខិតខំប្រឹងប្រែងដែលកំពុងបន្តធ្វើឡើង ដើម្បីធានាឱ្យបាននូវឱកាសពាណិជ្ជកម្មសម្រាប់ក្រុមហ៊ុនកាណាដាផងដែរ»។
ជាមួយគ្នានេះ រដ្ឋាភិបាលរបស់លោកនាយករដ្ឋមន្ត្រីកាណាដា Justin Trudeau ក៏បានលើកឡើងផងដែរថា ខ្លួនគោរពការសម្រេចចិត្តរបស់សមាជិកសភាក្នុងដំណើរទស្សនកិច្ចទៅកាន់កោះតៃវ៉ាន់។
ក្នុងសេចក្តីថ្លែងការណ៍មួយ ក្រសួងការបរទេសកាណាដា បានឱ្យដឹងថា៖ «[ជាធម្មតា] សមាគមសភា និងប្រតិភូនានាតែងតែធ្វើដំណើរ [ទៅក្រៅប្រទេស] ខណៈយើងគោរពឯករាជ្យភាពរបស់ពួកគេ»៕