អំពើពុករលួយ និងប្រាក់បៀវត្សតិចតួចដូចបច្ចុប្បន្ន ត្រូវបានក្រុមអ្នកតាមដានអះអាងថា ជាដើមចមធ្វើឱ្យកងទ័ពខ្មែរ​ផុង​ខ្លួនក្នុងអន្ទាក់បំណុល ដែលការណ៍នេះ រដ្ឋាភិបាលត្រូវមានវិធានការទប់ស្កាត់​បន្ទាន់ និងដំឡើងប្រាក់​ខែ​កង​កម្លាំងឱ្យបានសមរម្យ ទើបធ្វើឱ្យកង​ទ័ព​​មាន​លទ្ធភាពរើខ្លួនចេញពីវិបត្តិបំណុល​បាន។

អគ្គនាយកដ្ឋានអត្តសញ្ញាណកម្ម អះ​អាង​ថា ខ្លួនកំពុងបើកការស៊ើបអង្កេត​លើមន្ត្រីផ្កាយពីរម្នាក់ ជុំវិញរឿងអាស្រូវ​ពុក​រលួយ រត់​ការ​ផ្តល់សញ្ជាតិខ្មែរឱ្យជនបរទេស ជាថ្នូរនឹងទទួល​លុយ២លានដុល្លារ តែមិនបានសម្រេច ហើយមិនព្រម​ប្រគល់ប្រាក់ឱ្យជនរងគ្រោះវិញ។

អ្នកឃ្លាំមើលបានទាញសញ្ញាអាសន្ន ពីអំពើពុករលួយបែបប្រទាក់ក្រឡាគ្នា ដែល​ថា ជាមហន្តរាយជាតិ រយៈពេលយូរ ក្រោយសមត្ថកិច្ចរកឃើញសំបុកជនអន្តោប្រវេសន៍ខុសច្បាប់លាក់ខ្លួននៅខេត្ត​ព្រះសីហនុ ដែលជាប៉ូលសេដ្ឋកិច្ចរបស់​កម្ពុជា ក្រោយផ្ទុះការតវ៉ាទ្រង់ទ្រាយធំពីជនបរទេសចម្រុះជាតិសាសន៍។

បើទោះបីជាមានយុទ្ធនាការផ្សព្វផ្សាយព្រោងព្រាត ពីការរៃអង្គាសប្រាក់ និងស្បៀងអាហារជួយដល់កងទ័ពជួរមុខក្តី ក៏ប៉ុន្តែធាតុពិតជាក់ស្តែងកងទ័ពជួរមុខ​ភាគច្រើន កម្រទទួលបានជំនួយឧបត្ថម្ភណាស់ មិនត្រឹមតែប៉ុណ្ណោះប្រាក់​ខែ​ប្រមាណ១លានរៀលរបស់ពួកគេ ត្រូវបានអង្គភាពកាត់ថ្លៃម្ហូបអាហារចំនួន​១៣​ម៉ឺន​រៀលជារៀងរាល់ខែ និងកាត់ផ្សេងៗ​ទៀត រួមទាំងកាត់ចូលគណបក្សប្រជាជនកម្ពុជាផងដែរ ខណៈលោកហ៊ុន សែន ពាក់សុទ្ធតែនាឡិកាថ្លៃៗរហូតដល់ជិត១០គ្រឿងមានតម្លៃដល់៦០លានដុល្លារ។