សាលាដំបូងរាជធានីភ្នំពេញ បានបន្តបើកសវនាការលើភស្តុតាងដោះ​បន្ទុ​ក​ជា​ថ្មី​​ទៀត នៅព្រឹកថ្ងៃ​​ពុធ​​សប្ដាហ៍នេះ ជុំវិញបទចោទ «សន្និដ្ឋិភាពជាមួយរដ្ឋបរទេស ឬចង់ផ្ដួលរំលំរដ្ឋាភិបាល» ទៅលើ​​លោក កឹម សុខា ប្រធាន​គ​ណ​​បក្ស​​​​សង្រ្គោះជាតិដែលតុលាការរំលាយ ខណៈអង្គការ​​សង្គម​​ស៊ីវិលដែល​​ឃ្លាំ​​មើ​​លសវនាការ​នេះ លើកឡើងថា ការជំនុំ​​ជម្រះ​​​នេះ​​ប្រព្រឹត្ត​ទៅ​ក្នុង​បរិយាកាស​តានតឹង និង​​យក​​​ត្រូវរៀងៗខ្លួន ទាំង​​ភាគី​​​តំណាង​​អយ្យ​​ការ និងសហ​​មេធាវី​​ការ​ពារ​ក្ដីឱ្យ​ជន​ត្រូវ​ចោទ។

សាលាដំបូងរាជធានីភ្នំពេញ នៅព្រឹកថ្ងៃពុធសប្ដាហ៍នេះ បានបើកសវនាការបន្តទៀតលើភស្តុតាងដោះបន្ទុករបស់​​សហមេធាវីការពារក្ដីឱ្យលោក កឹម សុខា ជាប់ពាក់ព័ន្ធបទចោទ «ក្បត់ជាតិ ឬគប់គិតជាមួយ​​រដ្ឋ​​បរ​​​​ទេសចង់ផ្ដួលរំលំរដ្ឋាភិបាល» ដែលមានសហរដ្ឋអាមេរិកនៅក្រោយ និងគាំទ្រឱ្យមាន​​ចលនា​បដិ​វត្ត​ន៍​​​ពណ៌​។

ចៅក្រមសាលាដំបូងរាជធានីភ្នំពេញបានចាក់បង្ហាញវីដេអូ៦ឃ្លីបដែលមេធាវីការពារក្ដីឱ្យលោក កឹម សុខា បានដាក់ជាភស្តុតាងបញ្ជាក់ពីភាពស្អាតស្អំកូនក្ដីថា រាល់ការផ្លាស់ប្ដូរមេដឹកនាំ គឺតាមរយៈការបោះឆ្នោតស្របតាមរដ្ឋធម្មនុញ្ញកម្ពុជា មិនមែនជាការផ្លាស់ប្ដូរតាមការផ្ដួលរំលំ ឬបង្កហិង្សា និងធ្វើបដិវត្តន៍ពណ៌ឡើយ។

សវនាការលើសំណុំរឿង​លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការ​រំលាយ នឹងបន្តធ្វើនៅព្រឹកថ្ងៃទី៩ ខែកុម្ភៈ សប្ដាហ៍​ក្រោយ បន្ទាប់ពីសវនាការនៅព្រឹកថ្ងៃនេះបានបិទបញ្ចប់។