លោកនាយករដ្ឋមន្ត្រី ហ៊ុន សែន នៅថ្ងៃនេះ បានអបអរខួបនៃការដាក់ឱ្យប្រើប្រាស់រដ្ឋធម្មនុញ្ញ ខណៈប្រធានអតីតគណបក្សសង្គ្រោះជាតិ លោក កឹម សុខា បានអំពាវនាវឱ្យរួមគ្នា ការពារ គោរព និងអនុវត្តរដ្ឋធម្មនុញ្ញកម្ពុជាតាមស្មារតីដើម ដែលមានកិច្ចព្រមព្រៀងសន្តិភាពទីក្រុងប៉ារីសធ្វើជាមូលដ្ឋាន។
នៅថ្ងៃទី២៤ ខែកញ្ញានេះ ជាខួបទី២៨ឆ្នាំ ដែលកម្ពុជាបានប្រកាសឱ្យប្រើប្រាស់ជាផ្លូវការនូវរដ្ឋធម្មនុញ្ញនៃព្រះរាជាណាចក្រកម្ពុជា គិតចាប់តាំងពីឆ្នាំ១៩៩៣មក។
នៅក្នុងសារជាសំណេរនៅលើបណ្តាញសង្គមហ្វេសប៊ុក លោកនាយករដ្ឋមន្ត្រី ហ៊ុន សែន បានលើកឡើងថា រដ្ឋធម្មនុញ្ញ គឺជាច្បាប់កំពូលនៃព្រះរាជាណាចក្រកម្ពុជា ហើយច្បាប់និងសេចក្តីសម្រេចទាំងឡាយនៃស្ថាប័ននានារបស់រដ្ឋ ត្រូវស្របទៅនឹងរដ្ឋធម្មនុញ្ញជាដាច់ខាត។
លោកបានរម្លឹកថា ចំណុចសំខាន់ៗបំផុតមួយចំនួនដែលបានចែងច្បាស់នៅក្នុងរដ្ឋធម្មនុញ្ញ មានដូចជា កម្ពុជាត្រូវគោរពដាច់ខាតនូវរបបរាជានិយមអាស្រ័យរដ្ឋធម្មនុញ្ញ របបប្រជាធិបតេយ្យសេរីពហុបក្ស។ រដ្ឋធម្មនុញ្ញកម្ពុជា បានចែងអំពីគោលការណ៍នៃការបែងចែកអំណាចដាច់ដោយឡែកពីគ្នា គឺអំណាចនីតិបញ្ញត្តិ នីតិប្រតិបត្តិ និងតុលាការ ហើយក៏បានអនុម័តនូវសិទ្ធិជាមូលដ្ឋានរបស់ប្រជាពលរដ្ឋ និងគោលការណ៍នីតិរដ្ឋ ជាដើម។
លោកបានគូសបញ្ជាក់ថា៖ «ផ្តើមចេញពីកិច្ចព្រមព្រៀងសន្តិភាពទីក្រុងប៉ារីស នៅថ្ងៃទី២៣ ខែតុលា ឆ្នាំ១៩៩១ ស្តីពីដំណោះស្រាយរួមបញ្ចប់នូវវិបត្តិកម្ពុជាជាប្រវត្តិសាស្ត្រ ដែលបន្ទាប់មកនៅថ្ងៃទី២៣-២៨ ខែឧសភា ប្រទេសយើងបានរៀបចំការបោះឆ្នោតជាលើកដំបូងក្រោមការឧបត្ថម្ភគាំពារពីអង្គការសហប្រជាជាតិ អ៊ុនតាក់ [UNTAC]។ ក្រោយពីការបោះឆ្នោតរួចមក រដ្ឋធម្មនុញ្ញជាតិ ក៏ត្រូវបានបង្កើតឡើងជាប្រវត្តិសាស្ត្រនៅក្នុងឆ្នាំ១៩៩៣ ផងដែរ»។
ចំណែកលោក កឹម សុខា ប្រធានអតីតគណបក្សសង្គ្រោះជាតិ ក៏បានផ្ញើសារតាមរយៈគណនីហ្វេសប៊ុករបស់ខ្លួននៅថ្ងៃនេះដែរ ដោយលោកបានអំពាវនាវឱ្យរួមគ្នាបញ្ឈប់ការរំលោភរដ្ឋធម្មនុញ្ញ ដោយកុំបំពានលើរបបរាជានិយមអាស្រ័យរដ្ឋធម្មនុញ្ញ កុំងាកចេញពីគោលការណ៍ប្រជាធិបតេយ្យសេរីពហុបក្ស ព្រមទាំងពង្រឹងស្មារតីឯកភាពជាតិ គោរពសិទ្ធិគ្នាទៅវិញទៅមក និងលើកកម្ពស់គុណធម៌និងសីលធម៌ ជាដើម។
លោក កឹម សុខា ដែលកំពុងស្ថិតនៅក្រោមការឃ្លាំមើលរបស់តុលាការក្រោមការចោទប្រកាន់ពីបទក្បត់ជាតិនោះ ក៏បានយកឱកាសនេះអំពាវនាវឱ្យអ្នកនយោបាយទាំងអស់ជម្រុះចេញនូវអំពើហិង្សា ការបង្កការឈឺចាប់ និងការជេរប្រមាថគ្នា ដែលនាំមកនូវការបែកបាក់និងមហន្តរាយដល់សង្គមជាតិផងដែរ៕