ក្រុមអង្គការសង្គមស៊ីវិល និងសហជីពដែលធ្វើការលើផ្នែកសិទ្ធិការងារនិងសិទ្ធិមនុស្ស នៅថ្ងៃចន្ទសប្ដាហ៍នេះ ស្នើដល់ក្រសួងមហាផ្ទៃ និងរដ្ឋសភា ជួយអន្តរាគមន៍ដោះស្រាយបញ្ចប់វិវាទការងារនៅក្រុមហ៊ុនណាហ្គាវើលដ៍ ខណៈក្រុមកូដកររងការព្រមានពីវិធានការច្បាប់មិនឱ្យតវ៉ា ក្រោយរកឃើញពួកគេឆ្លងជំងឺកូវីដ-១៩។
ក្រុមអង្គការសង្គមស៊ីវិលទាំងនោះ រួមមាន មជ្ឈមណ្ឌលសិទ្ធិមនុស្សកម្ពុជា អង្គការការពារសិទ្ធិមនុស្សលីកាដូ សមាគមការពារសិទ្ធិមនុស្សអាដហុក មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស និងសហជីពមួយចំនួនទៀត។
បើតាមញត្តិដាក់ទៅស្ថាប័នទាំងពីរ គឺក្រុមអង្គការសង្គមស៊ីវិលនិងសហជីពទាំងនោះបានទាមទារឱ្យទម្លាក់ចោលការចោទប្រកាន់ និងដោះលែងតំណាងសហជីពទាំង៨នាក់ រួមទាំងអន្តរាគមន៍ដោះស្រាយវិវាទការងារនៅក្រុមហ៊ុនណាហ្គាវើលដ៍ឱ្យបានត្រឹមត្រូវនិងយុត្តិធម៌ផងដែរ។
ក្រុមអង្គការសង្គមស៊ីវិលទាំងនោះក៏ទាមទារឱ្យរដ្ឋាភិបាលបញ្ឈប់ការចោទប្រកាន់ ឬលាបពណ៌ទៅលើសហជីព សមាគម និងអង្គការសង្គមស៊ីវិល ដែលថាធ្វើសកម្មភាពមានចេតនាផ្ដួលរំលំរដ្ឋាភិបាលតាមរយៈ «បដិវត្តន៍ពណ៌» នៅពេលដែលពួកគេគ្រាន់តែអនុវត្តសិទ្ធិសេរីភាពជាមូលដ្ឋានដែលធានាដោយរដ្ឋធម្មនុញ្ញកម្ពុជា និងបទដ្ឋានសិទ្ធិមនុស្សអន្តរជាតិ ជាដើម។
ញត្តិដដែលនេះលើកឡើងថា ការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋ» ទៅលើថ្នាក់ដឹកនាំសហជីពទាំង៨នាក់ បានបង្ហាញថា សិទ្ធិការងាររបស់ពួកគេត្រូវបានរំលោភបំពានដោយនិទណ្ឌភាព ខណៈពួកគេគ្រាន់តែលើកឡើងពីការរំលោភបំពានសិទ្ធិការងារនៅក្រុមហ៊ុនដែលខ្លួនធ្វើការងារ និងស្វែងរកដំណោះស្រាយ បែរជាត្រូវប្រឈមមុខនឹងវិធានការច្បាប់ទៅវិញ។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មានប្រសាសន៍ថា ការចាប់ខ្លួន និងការរារាំងក្រុមកូដករកន្លងមក ធ្វើឡើងដោយសមត្ថកិច្ចដែលស្ថិតក្រោមការគ្រប់គ្រងដោយក្រសួងមហាផ្ទៃ ខណៈការតវ៉ារបស់ក្រុមកូដករនេះត្រូវបានរដ្ឋមន្ត្រីក្រសួងមហាផ្ទៃ លោក ស ខេង បានចាត់ទុកជាវិវាទការងារ។
លោកបន្តថា ជម្លោះនៅក្រុមហ៊ុនណាហ្គាវើលដ៍ គឺជាជម្លោះពាក់ព័ន្ធសិទ្ធិការងារនិងសេរីភាពសហជីពនៅកន្លែងការងារសុទ្ធសាធ។
លោកបន្ថែមថា៖ «អ៊ីចឹងបើករណីនៅណាហ្គានេះមិនត្រូវបានដោះស្រាយ ជាការពិតណាស់ វានឹងជិះឥទ្ធិពលនូវគំរូអាក្រក់ទៅនិយោជកដែលមានឥទ្ធិពលផ្សេងទៀត ក្នុងការបន្តនូវការរំលោភបំពានសិទ្ធិការងារ ការកេងប្រវ័ញ្ចទៅលើកម្លាំងពលកម្ម ហើយវានឹងធ្វើឱ្យការធ្លាក់ថយក្រោយនូវសិទ្ធិផ្នែកអង្គការវិជ្ជាជីវៈឬសិទ្ធិសហជីពនេះ»។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានថ្លែងថា រដ្ឋសភាជាកន្លែងដែលតំណាងរាស្ត្រធ្វើការ ហើយតំណាងរាស្ត្រត្រូវមើលបញ្ហាទុក្ខលំបាករបស់ប្រជាពលរដ្ឋ និងទទួលខុសត្រូវក្នុងនាមខ្លួនជាស្ថាប័នឃ្លាំមើលការអនុវត្តច្បាប់ ខណៈកូដករណាហ្គាវើលដ៍កំពុងរងភាពអយុត្តិធម៌ ដោយសារក្រុមហ៊ុនបញ្ឈប់ពីការងារ និងឃុំខ្លួនទាំងខុសច្បាប់។
លោកស្រីបន្តថា ស្ថាប័នរដ្ឋសភាគួរកោះហៅភាគីពាក់ព័ន្ធមកសួរដេញដោលអំពីបញ្ហានេះ ដើម្បីស្វែងរកដំណោះស្រាយ ដោយមិនគួរណាធ្វើមិនដឹងមិនឮនោះទេ ខណៈការចាប់ខ្លួន និងការប្រមូលផ្ដុំតវ៉ារបស់ក្រុមកូដករធ្វើឡើងនៅក្បែររបងរដ្ឋសភាថែមទៀត។
លោកស្រី ចក់ សុភាព បន្ថែមថា៖ «យើងនិយាយថាកម្ពុជាជាប្រទេសគិតគូរពីសមភាពយេនឌ័រ យើងនិយាយថាកម្ពុជាមានសន្តិភាព យើងនិយាយថាកម្ពុជាប្រកាន់នូវនីតិរដ្ឋ។ អ៊ីចឹងសួរថា តើតំណាងរាស្ត្របានដឹងឮអំពីបញ្ហាកូដកម្មដែលកូដករបានធ្វើទេ? ហើយបានដឹងពីព្រឹត្តិការណ៍នៃការចាប់ខ្លួនទៅលើកញ្ញា ស៊ីថរ យ៉ាងកំរោលដែរទេ? តើតំណាងរាស្ត្រគាត់នឹងត្រូវធ្វើចំណាត់ការ ឬក៏កិច្ចការអីដែលតំណាងរាស្ត្រត្រូវឆ្លើយតបនឹងបញ្ហាដែលពលរដ្ឋកំពុងដង្ហោយហៅស្វែងរកដំណោះស្រាយនេះ?»
វីអូឌី មិនអាចសុំការឆ្លើយតបពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងអ្នកនាំពាក្យរដ្ឋសភា លោក ឡេង ប៉េងឡុង បានទេ នៅថ្ងៃចន្ទសប្ដាហ៍នេះ។
បើតាមលោកស្រី ចក់ សុភាព ដែលចូលយកញត្តិទៅដល់ក្នុងស្ថាប័នទាំងពីរផ្ទាល់ គឺមន្ត្រីការិយាល័យរដ្ឋសភា និងក្រសួងមហាផ្ទៃ បានទទួលញត្តិពីពួកគាត់ ប៉ុន្តែពុំមានការឆ្លើយតបយ៉ាងណានោះទេ។
កាលពីថ្ងៃទី៦ ខែកុម្ភៈនេះ អាជ្ញាធររាជធានីភ្នំពេញបានចេញសេចក្ដីជូនដំណឹងមួយដោយតម្រូវឱ្យក្រុមកូដករណាហ្គាវើលដ៍ត្រូវទៅយកសំណាកតេស្តរកជំងឺកូវីដ-១៩ និងត្រូវនៅដាច់ដោយឡែករយៈពេល៧ថ្ងៃ ក្រោយធ្វើតេស្តរួច ព្រមទាំងត្រូវបញ្ឈប់ការប្រមូលផ្ដុំតវ៉ា ដោយអនុវត្តតាមវិធានការសុខាភិបាល។ អាជ្ញាធររាជធានីភ្នំពេញ ក៏បានព្រមានចាត់វិធានការច្បាប់ក្នុងករណីពួកគេមិនអនុវត្តតាម។
ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្ន ក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ កាលពីថ្ងៃទី៥ ខែមករា ឆ្នាំ២០២២ ក្រោយពីពួកគេដឹកនាំក្រុមកូដករទាមទារសិទ្ធិនិងលក្ខខណ្ឌការងារនៅក្នុងក្រុមហ៊ុនកាស៊ីណូណាហ្គាវើលដ៍។
កាលពីថ្ងៃទី១៨ ខែមករា ឆ្នាំ២០២២ សហជីពអន្តរជាតិបានផ្ញើលិខិតមួយទៅកាន់លោកនាយករដ្ឋមន្ត្រី ហ៊ុន សែន ដោយលើកឡើងថា វិវាទការងារនៅក្រុមហ៊ុនណាហ្គាវើលដ៍បានកើតចេញពីការបរាជ័យជាយូរណាស់មកហើយរបស់ភាគីក្រុមហ៊ុន ក្នុងការគោរពសិទ្ធិកម្មករនិងសហជីព ចំពោះកិច្ចចរចាដោយសមូហភាព ដើម្បីទទួលបានប្រាក់ឈ្នួលនិងលក្ខខណ្ឌការងារកាន់តែល្អប្រសើរ។
លិខិតនោះបន្តថា ក្រុមហ៊ុនណាហ្គាវើលដ៍មិនបានគោរពតាមគោលការណ៍របស់រដ្ឋាភិបាលលើការងារ សុវត្ថិភាព និងការការពារសុខភាពក្នុងអំឡុងពេលមានជំងឺកូវីដ-១៩នោះទេ។
ផ្ទុយទៅវិញ បុគ្គលិកនិយោជិតចំនួន១ ៣២៩នាក់ ត្រូវបានបញ្ឈប់ពីការងារដោយមិនបានពិគ្រោះយោបល់ក្រោមច្បាប់ការងារកម្ពុជាឡើយ ដោយក្នុងចំណោមនោះមានបុគ្គលិក១ ១០០នាក់ គឺជាសមាជិកសហជីព៕