អាជ្ញាធរខេត្តកោះកុងបានប្រកាសថា នឹងបញ្ចប់ការដោះស្រាយបញ្ហាដីធ្លីរបស់ប្រជាពលរដ្ឋដែលរងផលប៉ះពាល់ពីគម្រោងវិនិយោគអភិវឌ្ឍន៍របស់ក្រុមហ៊ុនចិនឈ្មោះ យូញៀន ឬ UDG ឱ្យចប់សព្វគ្រប់ត្រឹមថ្ងៃទី៣០ ខែមីនា ឆ្នាំ២០២២ ខាងមុខនេះ។
កាលពីខែកញ្ញា ឆ្នាំ២០២១ រដ្ឋបាលខេត្តកោះកុង បានប្រកាសអំពីដំណើរការដោះស្រាយវិវាទដីធ្លីជូនពលរដ្ឋចំនួន៣ប្រភេទ មានចំនួនប្រមាណ១ ៣៣០គ្រួសារ ដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន យូញៀន ស្ថិតនៅស្រុកបទុមសាគរ និងស្រុកគិរីសាគរ ព្រមទាំងបានជូនដំណឹងជាបន្តបន្ទាប់ទៀត ឱ្យប្រជាពលរដ្ឋទៅចាប់ឆ្នោតយកដីឡូត៍ទៅតាមការកំណត់របស់អាជ្ញាធរ។
សេចក្ដីជូនដំណឹងរបស់រដ្ឋបាលខេត្តកោះកុង កាលពីថ្ងៃទី១៨ ខែមីនា ដែលវីអូឌីទើបទទួលបាន ឱ្យដឹងថា ការដោះស្រាយគោលនយោបាយជូនប្រជាពលរដ្ឋរងផលប៉ះពាល់ពីគម្រោងវិនិយោគអភិវឌ្ឍន៍របស់ក្រុមហ៊ុន យូញៀន ជាង១ ៣០០គ្រួសារ ដែលត្រូវបែងចែកជា៣ប្រភេទេ នឹងបញ្ចប់នៅត្រឹមចុងខែមីនា។
អាជ្ញាធរខេត្តកោះកុង បានអំពាវនាវដល់ពលរដ្ឋទាំង៣ប្រភេទដែលមិនទាន់ទទួលយកការដំណោះស្រាយគោលនយោបាយពីរដ្ឋាភិបាល ត្រូវចូលមកទទួលយកដំណោះស្រាយតាមការកំណត់។
សេចក្ដីជូនដំណឹងបន្តថា៖ «ប្រសិនបើបងប្អូនប្រជាពលរដ្ឋទាំង៣ប្រភេទ ខកខានមិនបានទទួលយកការដោះស្រាយគោលនយោបាយតាមពេលវេលាកំណត់នេះទេ អាជ្ញាធរជាតិដោះស្រាយទំនាស់ដីធ្លី និងរដ្ឋបាលខេត្តកោះកុង ចាត់ទុកថា បងប្អូនប្រជាពលរដ្ឋបោះបង់សិទ្ធិទទួលយកការដោះស្រាយគោលនយោបាយរបស់រាជរដ្ឋាភិបាល ហើយអាជ្ញាធរជាតិដោះស្រាយទំនាស់ដីធ្លី និងរដ្ឋបាលខេត្តកោះកុង មិនទទួលខុសត្រូវនូវរាល់ការបាត់បង់ផលប្រយោជន៍របស់បងប្អូនឡើយ»។
កាលពីចុងឆ្នាំ២០២១ រដ្ឋបាលខេត្តកោះកុង បានឱ្យដឹងថា ការដោះស្រាយវិវាទដីធ្លីជូនពលរដ្ឋដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន យូញៀន ត្រូវបានបែងចែកជា៣ប្រភេទ។ ប្រភេទទី១ ជាប្រជាពលរដ្ឋរស់នៅក្នុងទីតាំងវិនិយោគរបស់ក្រុមហ៊ុន មានចំនួន២៤៧គ្រួសារ ដោយទទួលបានសំណងគោលនយោបាយជាដីលំនៅឋានទំហំកន្លះហិកតា ដីចម្ការ ៣ហិកតា និងថវិកា៩ ០០០ដុល្លារ។
ចំណែកពលរដ្ឋប្រភេទទី២ ជាប្រជាពលរដ្ឋរស់នៅខុសមូលដ្ឋាន ឬខុសភូមិឃុំ មានចំនួន២៥៥គ្រួសារ ដោយទទួលបានសំណងជាដីចម្ការទំហំ២ហិកតាក្នុងមួយគ្រួសារ បើទោះបីជាពួកគេមានដីទំហំប៉ុណ្ណាក៏ដោយ ខណៈប្រភេទទី៣ ជាប្រជាពលរដ្ឋស្នើសុំគោលនយោបាយបន្ថែម មានចំនួន៨៣១គ្រួសារ ត្រូវទទួលបានសំណងដី ១ហិកតាក្នុងមួយគ្រួសារ។
តំណាងពលរដ្ឋរស់នៅឃុំកោះស្ដេ ស្រុកគិរីសាគរ អ្នកស្រី សាំង ពុយ បានប្រាប់ វីអូឌី នៅព្រឹកថ្ងៃអង្គារនេះថា រហូតមកដល់ពេលនេះ គាត់បានដាក់ញត្តិទៅក្រសួងរៀបចំដែនដី ក្រសួងបរិស្ថាន ខុទ្ទកាល័យនាយករដ្ឋមន្ត្រី ក្រសួងមហាផ្ទៃ សាលាខេត្ត រដ្ឋសភា ព្រឹទ្ធសភា ទាក់ទងនឹងវិវាទដីធ្លីមួយនេះជាច្រើនលើកច្រើនសា ប៉ុន្តែនៅតែមិនទាន់ទទួលបានដំណោះស្រាយដោយយុត្តិធម៌នោះទេ។
ប្រភពដដែល នៅតែពុំអាចទទួលយកការដោះស្រាយរបស់អាជ្ញាធរដែលបានកំណត់នោះឡើយ។
អ្នកស្រី សាំង ពុយ មានប្រសាសន៍ថា៖ «សម្រាប់អ្នកមិនមានដី និងមានដីតិចតួច គឺគេអាចទទួលយកបានដីពីរហិកតាហ្នឹង ប៉ុន្តែសម្រាប់ពួកខ្ញុំមានដីយ៉ាងតិច១០ហិកតាឡើងទៅ គឺមិនអាចទទួលយកបានទេ វាអយុត្តិធម៌»។
តំណាងពលរដ្ឋរូបនេះបានឱ្យដឹងទៀតថា ការដោះស្រាយចំពោះប្រជាពលរដ្ឋប្រភេទ២ដែលខុសភូមិខុសឃុំ ត្រូវបានធ្វើឡើងចំនួន២លើក ដោយលើកទី១ ទទួលបានសំណង ដូចជា ផ្ទះ ដី ចម្ការ ជាដើម រីឯលើកទី២ ទទួលបានដីចំនួនមួយហិកតាបន្ថែមទៀត។
អ្នកស្រី សាំង ពុយ បន្តថា ពួកគាត់បានតវ៉ារឿងនេះអស់រយៈពេលជាង១០ឆ្នាំហើយ តែមិនទទួលបានដំណោះស្រាយអ្វីសោះឡើយ។
អ្នកស្រីបន្តថា៖ «ខ្ញុំគិតពិតមែនថា ខ្ញុំអស់សង្ឃឹមច្រើនណាស់ ដោយខំដាក់ញត្តិអស់រយៈពេល១០ឆ្នាំ រហូតដល់គេហៅសាធារណជនទាំងអស់ថាមុខពួកបងប៉ុន្មាននាក់នេះដែលខំទាមទារឱ្យរកដំណោះស្រាយ ចុងបញ្ចប់ ដោះស្រាយឱ្យអ្នកមិនដែលបានទាមទារ»។
ចំណែកឯអ្នកស្រី ទិត្យ តេន ដែលអះអាងថាជាតំណាងពលរដ្ឋនៅឃុំព្រែកខ្សាច់ បានលើកឡើងថា ដីអ្នកស្រីមានទំហំជិត៧០ហិកតា ហើយការផ្ដល់សំណងត្រឹមដី២ហិកតា ធ្វើឱ្យអ្នកស្រីមិនអាចទទួលយកបានឡើយ។
លោកស្រី ទិត្យ តេន មានប្រសាសន៍ថា៖ «ការសម្របសម្រួលនោះ ខ្ញុំទទួលមិនបានទេ ព្រោះដីខ្ញុំច្រើន។ ហើយគេដាក់ថាប្រភេទទី២ គេឱ្យតែពីរហិកតា ខ្ញុំមានតែតវ៉ាបន្ថែមទៀត»។
លោកស្រី បន្ថែមថា បើគ្មានដំណោះស្រាយសមរម្យទេ ពួកគាត់គ្រោងទៅដាក់ញត្តិនៅតាមស្ថាប័នរដ្ឋបន្ថែមទៀត ដូចជា ដាក់ទៅឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក ទៀ បាញ់ ដើម្បីឱ្យថ្នាក់ជាតិចុះមកត្រួតពិនិត្យផ្ទាល់និងដោះស្រាយលើបញ្ហានេះ។
មន្រ្តីសម្របសម្រួលអង្គការការពារសិទ្ធិមនុស្សលីកាដូ ប្រចាំខេត្តកោះកុង លោក ហ៊ួរ អ៊ីន បានលើកឡើងថា ដំណោះស្រាយដែលបានផ្ដល់ឱ្យប្រជាពលរដ្ឋទាំង៣ប្រភេទនោះ គឺមិនបានបង្ហាញភាពយុត្តិធម៌សម្រាប់ជនរងគ្រោះពិតប្រាកដឡើយ។
លោក ហ៊ួរ អ៊ីន មានប្រសាសន៍ថា៖ «ការដាក់ឱសានវាទឱ្យអនុវត្តបែបនេះ គឺជាការមិនទទួលខុសត្រូវរបស់ថ្នាក់ខេត្ត នៅពេលដែលប្រជាពលរដ្ឋរងគ្រោះជាង១០ឆ្នាំហើយ ដែលបានប៉ះពាល់ដោយការអភិវឌ្ឍនេះ»។
ក្រុមហ៊ុនចិន យូញៀន ឌីវេឡុបមែន (Union Development Group) ឬ UDG ទទួលបានដីសម្បទានសេដ្ឋកិច្ចទំហំ៣៦ ០០០ហិកតា ដែលមានទីតាំងស្ថិតនៅក្នុងស្រុកបទុមសាគរ និងស្រុកគិរីសាគរ ខេត្តកោះកុង ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ កាលពីឆ្នាំ២០០៨។
កាលពីខែកញ្ញា ឆ្នាំ២០២០ ក្រសួងរតនាគារសហរដ្ឋអាមេរិក បានប្រកាសដាក់ទណ្ឌកម្មលើក្រុមហ៊ុនចិន យូញៀន ឬ UDG នេះ ដែលកំពុងអនុវត្តគម្រោងអភិវឌ្ឍន៍នៅតំបន់តារាសាគរ ខេត្តកោះកុង។
ការសម្រេចដាក់ទណ្ឌកម្មដោយដាក់បញ្ចូលក្នុងបញ្ជីខ្មៅ ដែលត្រូវបង្កកទ្រព្យសម្បត្តិ ឬហាមប្រាមអ្នកជំនួញរបស់ខ្លួនមិនឱ្យរកស៊ីជាមួយជាដើមនោះ ក្រោយអាមេរិករកឃើញថា ក្រុមហ៊ុន UDG មានជាប់ពាក់ព័ន្ធការរំលោភយកដីធ្លី និងបំផ្លិចបំផ្លាញទ្រព្យសម្បត្តិរបស់ពលរដ្ឋខ្មែរ ករណីរំលោភបំពានសិទ្ធិមនុស្សធ្ងន់ធ្ងរ និងអំពើពុករលួយនៅកម្ពុជា៕
